Kubhekwe iPaarl ukuba ikhale yemuke nesicoco seBetwaySA 20

IPAARL Royals izibeke ethubeni lokukhala yemuke nesicoco seBetwaySA20 ehleli esicongweni salo mqhudelwano ngamaphuzu awu-28 emidlalweni ewu-8 kanti inqobe ewu-7 yahlulwa kanye.
Namuhla ngoLwesine izotholana phezulu neJoburg Super Kings elele endaweni yesine ngamaphuzu awu-15. IPaarl kuzokuthi ngoMgqibelo iphinde itholane phezulu neSunrisers Eastern Cape bebe izingqwela nyakenye kumanje iSunrisers izinto aziyihambeli kahle njengoba ilele endaweni yesithathu namaphuzu awu-19.
IPaarl iqophe umlando nonyaka ngokuba yikilabhu yokuqala ukudlala imidlalo eyisihlanu ekhaya ingayazi induku. Iya kulo mqhudelwano iphethe ukhilimu wabadlali. Phakathi kwabo kukhona uKwena Maphaka, uLuhan-dre Pretorious abagijima eqenjini lesizwe iProteas kanti ibambe umoya ngokululama kukaDavid Miller.
Iqembu laKwaZulu-Natal iDurban’s Super Giants (DSG) yiyona ebambe ibhuleki ngamaphuzu awu-8 emidlalweni ewu-9 kanti isanqobe umdlalo owodwa nje vo. IDSG isidlalela ukugcina icala njengoba ingeke isakwazi ukudlala imidlalo eyandulela ayamanqamu ezoqala ngoLwesibili Le kilabhu kuzokuthi ngoMgqibelo itholane phezulu neJoburg Super Kings
Isiyonke imidlalo yeBetway SA20 imi kanje:
NAMUHLA NGOLWESINE
EJohannesburg: Joburg Super Kings vs Paarl Royals 17h30.
KUSASA NGOLWESIHLANU
ECenturion: Pretoria Capitals vs MI Cape Town 17h30.
NGOMGQIBELO
EGqeberha: Sunrisers Eastern Cape vs Paarl Royals 13h00.
EJohannesburg: Joburg Super Kings vs Durban’s Super Giants 17h30.
NGESONTO
ECape Town: MI Cape Town vs Pretoria Capitals 15h30.