Wenze irekhodi lamajuniya uBayanda Walaza

UBAYANDA Walaza obe ngomunye wabasubathi abahlomulele iNingizimu Afrika indondo yesiliva kwi-4x100m kuma-Olympic Games eFrance nyakenye usephinde wagila izimanga ebeka irekhodi elisha laseNingizimu Afrika lamajuniya ngoMgqibelo kwiGauteng North Athletics Provincial Track and Field Championships abesePilditch eTshwane.

Lo msubathi ube ngowokuqala waseNingizimu Afrika abaneniminyaka engaphansi kuka-20 (Junior) ukwenza isikhathi esiwu-9.99 kwi-100m. Kulo mjaho ubukise izithende uGift Leotlela owenze u-10.17 kwathi u-Emile Erasmus walala isithathu eqopha u-10.26. Lo msubathi obehlanganisa iminyaka ewu-19 kulenyanga kubhekwe lukhulu kuyena njengoba iqembu lakuleli le-4x100m libhekwe ngabomvu ukuba lenze kahle kumaWorld Athletics Championships azokuba ngoSeptember eChina.

Lo msubathi ujoyine u-Akani Simbine ophethe irekhodi lakuleli le-100m esigabeni esivulelekile okuwu-9.82.UBayanda unqoba lo mjaho nje, kuthe ngoLwesithathu omunye umsubathi wakuleli osemncane uKarabo Letebele oneminyaka ewu-19 ubudala wamangaza abathandi balo mdlalo edla umhlanganiso kwi-Athletics South Africa (ASA) Grand Prix kuyo lenkundla. UKarabo ushiye umpetha wase-Afrika kulo mjaho uFerdinand Omanyala waseKenya. IKwaZulu-Natal Athletics kuzokuthi ngoLwesihlanu nangoMgqibelo isingathe imidlalo yayo yesifundazwe yeTrack and Field ezokube ihlanganise neyamaTVET College ezokuba seMsunduzi Athletics Stadium, eMgungundlovu.