Baqophe umlando abasubathi bakuleli benza amarekhodi eDenmark
IZINGQWELE zeHollywoodbets Durban 10km uTayla Kavanagh noTshepo Tshite benze amarekhodi aseNingizimu Afrika kwiWorld Road Running Championships ebingoMgqibelo nangeSonto eCopenhagen, eDenamrk.
UTayla oyingqwele yeSpar Women Challenge kumlenze waseThekwini ngokwehlukana waphinde wanqoba iHollywoodbets Durban 10km ungene endaweni yesine kwi-5km eqopha isikhathi esiwu-14:51 ecisha u-15:10 owenziwa ngu-Elana Meyer eminyakeni ewu-32 edlule.
UKavanagh uhlulwe indondo yethusi ngomzuzwana owodwa. Uya kulo mqhudelwano nje, usefomini enhle kakhulu njengoba eyingqwele yakuleli ye-10 000m ne-5000m ngokwehlukana. NgoJuly ubemele iNingizimu Afrika kukaCommonwealth Games nalapho enze kahle kakhulu.
“Ekhuluma nabezindaba ngemuva komdlalo uthe: “Ngizizwa ngibusisekile ngokwenzekile. Namanje kangikakholwa ngendlela engigijime ngayo. Nangesikhathi engisenzile singijabulisa kakhulu. Eminyakeni emithathu eyedlule ngenza isikhathi esiwu-15:50 ngaphuma unombolo 15 manje ngenze u-14:51 oyirekhodi lakuleli.
“Ngize kulo mjaho nginesifiso sokwenza kahle. Ngithe uma ngibona iwashi ngidlula ngidlula ku-3km, ngabona ukuthi ukwenza irekhodi le-5km.”
UTshite ungene unombolo 10 ngesikhathi esiwu-3:55:66 okuyirekhodi lakuleli ecisha u-3:56 beliphethwe nguRyan Mphahlele kwathi uKarabo More wabeka u-4:33:27 kwi-mile. UKarabo oqeqeshwa nguCaster Semenya uyingqwele yakuleli ye-1500m.
Kusenjalo uMaxime Chaumeton ophethe irekhodi lakuleli le-5km okuwu-13:06 ungene unombolo 10 ngesikhathi esiwu-13:13. Sisekuwu lo mjaho uCwenga Nose wePhantane Athletics Club wenze iPB ebeka u1:01:09 engena unombolo 22 kwi-21km enqontswe ngu-Andreas Almgren waseSweden kwathi u-Elroy Gelant ophethe irekhodi lakuleli leMarathon wangena unombolo 86 ngo-1:04:41
U-Agnes Ngetich udle umhlanganiso kwi-21km kwabesifazane kwathi imfivilithi yakuleli uGlenrose Xaba wangena unombolo 13 ngesikhathi esiwu-1:07:49
