UBUYISELWE NGO’ELETHU OWEKZN SPORTS CONFEDERATION

UNIKEZWE ithuba lokuphinde ahole iKwaZulu-Natal Sports Confederation uThami Mchunu okhethweni lwale nhlangano oluzokuba ngoMgqibelo eThekwini. 

Umnotho News uthole ukuthi uMchunu akaphikiswa muntu kwesokungamela le nhlangano ephethe ezemidlalo esifundazweni. 

Okungafani nokhetho oludlule ngo-2020 lapho babebaningi ababemponsela inselelo.

Isikhundla esibhekwe kakhulu ngesesekela likaMchunu lapho kuzoqokwa khona amabili kanti kuthiwa bathathu abaqaqele lesi sikhundla. Phakathi kwabo kukhona uPeter Thompson obevele eyisekela, kube nguZilungile Ntombela, uBongani Sibiya no-Aleck Skhosana oke waphatha iKwaZulu-Natal Athletics ne-Athletics South Africa (ASA) ngokwehlukana. 

Ngokusho kukaMchunu uthi: “Konke sekumi ngomumo ngosuku lo khetho. Sesilinde uMgqibelo ufike wedlule. Ngijabule kakhulu ngokuthi ibhodi isabuthemba ubuholi bami.

Engingakusho ukuthi kuzokuba ihlandla lami lokugcina ngihola lenhlangano.”

USibonelo Khulu oyilunga lalenhlangano ngaphansi kukamasipala uMzinyathi uthe bayamfuna abuye uMchunu ukuzohola lenhlangano. 

Uthi omunye umuntu abamfisayo kuyo nguSkhosana. Uthi kodwa ubengakafiki kubona ukuzonanxenxa ukuba bamvotela. 

“UMchunu usawenza kahle umsebenzi wakhe. Ngakhoke ngibona kufanele ukuba anikwe elinye ithuba lokuba asihole. 

“Ubunzima bubonakala kuzokuba kumasekela. Kunabantu abane abakhona. 

“UThompson kubukeka kuzokuba nzima ukumgudluza esikhundleni sakhe. 

“USkhosana uyafika kulesi sikhundla. Kasazi kuzokwenzakalani sizobona ngoMgqibelo,” kusho uKhulu.