Bahlelelwe indawo yokupaka ephephile abasubathi abaya kwiBest of the Best

ZIZOKUBE ziqinikele ezokuphepha kwiBest of the Best Marathon ezokuba ngeSonto ihambisana ne-21km no-10km ezosukela iphinde iphelele eKings Park Athletics Stadium.
Lo mjaho okhula mawala esifundazwene njengoba kuthiwa abasubathi abazokwenza izikhathi ezinhle kuwaona bazothola amaphuzu azobasiza ukubamba iqhaza emidlalweni yomhlaba efana nomaWorld Athletics Championshipa nama-Olympic Games. Lo mjaho kuthiwa ungeminye esingaphansi kweWorld Athletics.

Sekusele izinsuku ezine ngaphambi kukuba zibulalane kwiBest of the Best #Isukile

UMthoko Khuzwayo ongumdidiyeli walo mjaho iBest of the Best uthe konke sekumi ngomumo ngomjaho wabo wangeSonto.
“Inkinga esibhekene nayo ukugqekezwa kwezimoto uma kunemijaho. Nonyaka sinendawo ekhethekile lapho abagijimi bezopaka khona izimoto zabo. Sicela abagijimi uma befika ekuseni ngeSonto bangene eVirgin Active baye ezinkundleni zemidlalo ezingaphakathi. Lapho zizokube ziphephele khona izimoto.

“Siphoqelekile ukuba sibe nendawo efunze lena ukugwema ukugqekezwa nokutshontshwa kwezimoto ngosuku lo mjaho. Uma ufuna ukupaka kulendawo yethu kuzofanele uthenge ithikithi eliwu-R50 ukuze ukwazi ukungena. Lendawo izokube igadwe ngonogada abawu-6. Njengoba umjaho uqala u-5 ekuseni kubalulekile ukuba abasubathi bafike ngabo-03h30 ekuseni ngoba eminye imigwaqo izokube ivaliwe,” kusho uKhuzwayo.

Abasubathi abazophula lamarekhodi angenhla bazohlomula ngo-R20 000 ngokuhlukana kobulili

Uqhube wathi uma ufuna ukungaphazamiseki kuhle ukuba ungene ngoMngeni Road ujike usubheke eVirgin Active. Nalapho kufanele uphathe ithikithi nhesandla.
“Sivale ukubhalisa online ngoLwesibili sekubhalise abasubathi abawu-3000. Kubukeka sizokwazi ukuthola isibalo esisifunayo okuwu-5000. Izinamba zizolandwa ngoLwesihlanu nangoMgqibelo eKings Park Athletics Stadium, kanti amathikithi azokube ethengwa ngalo lolu suku, sizophinde samukele imingenelo,” kuphetha uKhuzwayo.