Injabulo kwiMeya yaseHarry Gwala isicoco somjaho wabo sisala ekhaya
Imeya yaseHarry Gwala uZamo Nxumalo ehalalisela uSinethemba Tshangase ngokuba yingqwele yomjaho wabo obungeSonto.
KAYIYIFIHLANGA injabulo yayo imeya yaseHarry Gwala UZamo Nxumalo ngokwenza kahle komsubathi wendawo uSinethemba Tshangase edla umhlanganso kwiHarry Gwala Marathon ebingeSonto eqale eHighflats yasongwa eMzimkhulu. Lo mjaho ubuhambisana ne-21km, i-10km ne-5km
Lo mjaho wokuzibekisela indawo kwiComrades Marathon ezokuba mhla ka-8 kuJune isukela eMgungundlovu isonwge eThekwini. UTshangase ongowokuzalwa KwaMthwane eMzimkhulu udle umhlanganiso kulo mjaho wazihlomulela ngesamba sika-R60 000. Imeya uNxumalo ubeyingxenye ye-10km.
Yingesikhathi uTshangase amukeliswa isheke lakhe ngabahlonishwa yaseHarry Gwala abebehambisana noSteve Mkasi weKZNA noWillie Mtolo.
Umjaho wanonyaka ubugubha iminyaka ewu-10 wasungula kanti okujabulile imeya kakhulu wukuthi ingqwele kube ngumsubathi wendawo. UTshangase oqeqeshwa nguMthandeni Nene weMthande Athlete Management obekhona ngesikhathi umsubathi wakhe eshaya intambo. Lo msubathi usanda kunqobela iNingizimu Afrika indondo yesiliva kumaSouth Africa National Marathon okuyinto eyamthokozisa kakhulu umqeqeshi wakhe. UTshangase unqobe lo mjaho nje, uke wangenaendaweni yesibili eminyakeni edlule.
UMthandeni Nene ofulathela ehalalisela umsubathi wakhe uSinethemba.
Uqophe isikhathi esiwu-2:20 elandelwa nguNtsindiso Mphakathi oke wawunqoba lo mjaho phambilini. Indawo yesithathu ithathwe nguSiyabonga Ndlovu.
“Ngijabule kakhulu ukuthi umklomelo wanonyaka usale lapha eMzimkhulu. Nibambisane ningabasubathi baseMzimkhulu nikhulise nezinye izingane zalapha eMzimkhulu. Zikhona ziningi izingane zalapha eMzimkhulu ezincane ezenza kahle. Ngizwile ukuthi kukhona eziya kuma-national ezikole eBloemfontein kanti kukhona nabaya eCape Town. Lokho kusijabulisa kakhulu,” kusho iMeya.
UTshangase ongomunye wabasubathi abazokuba yingxenye yeComrades Marathon uthe ujabule kakhulu ngokunqoba lo mjaho wangakubo, waze wakwazi ukuma eduze kwabantu abakhulu njengemeya.
“Ngijabule kakhulu ngokuba yingqwele yomjaho wangasekhaya. Kumnandi kabi ukunqoba ngakini. Nabantu ukuze bayibone into oyenzayo. Okungiphatha kabi wukuthi ugogo wami akekho ukuzongihalalisela ngenxa yokungaphila kahle. Ngiyazi ukuthi ngabe ukhona lapha.
“Ngalo mklomelo engizowuthola lana ngizomjabulisa ngokuthila kwazise inkulu indima ayidlalile empilweni yami. Uwe evuka nami ezinsukwini ezinzima. Ngeke ngikhohlwe umqeqeshi wami uNene. UNene udele konke ngathi. Ashiye umndeni wakhe azosiza thina. Sivuka ekuseni naye uNene kushe iteki sizilungiselala imijaho efunze lena. Ngaphandle kwesineke sakhe nokukholelwa kwakhe kuthina ngabe kasikho lapha. Nathi siyazama ukuba simjabulise ukuze angadikibali.
“Engingakusho entsheni ukuthi kuyaphileka ngezemidlalo, uma izozimisela. Kodwa ingakhohlwa yimfundo,” kusho uTshangase.
UNtsindiso Mohakathi amukela isheke lakhe ngokungena endaweni yesibili.
UNene uthe ujabule kakhulu ngokwenza kahle komsubathi wakhe. Uthi akuthandayo ngaye wukuthi uyalalela bese enza lento atshelwa yona. Uthi ziningi izinhlelo nazo ngaye.