IKwaZulu-Natal Athletics ibuye nendondo yesiliva neyethusi kumaSA 10km Champs

UTayla Kavanagh ophakathi nendawo obe yingqwele yeSouth Africa National 10km Championships ngoMgqibelo eMangaung kanti uphahlwe nguKarabo Mailula ongene isibili no-Elizabeth Hutamo othathe indawo yesithathu: Isithombe: KZN Athletics Facebook Page.

UMSUBATHI waKwaZulu-Natal uTayla Kavanagh osubathela iHollywood Athletics Club noChris Mhlanga babe izingqwele zeSouth Africa National 10km ngoMgqibelo eMangaung eFree State. Kulo mjaho bekugadulisana abasubathi bakuleli abaphuma kuzo zonke izifundazwe zakuleli. UKavanagh ohlomule ngomklomelo wokuba ngumsubathi ovelele esifundazweni uye kulo mjaho eyimfivilithi. Ushaye intambo ngesikhathi esiwu-33:05 evule igebe lika-400m kuKarabo Mailula. 

UKarabo osanda kuhlabana ngomklomelo ka-R50 000 ngokungena isine kwiSpar Grand Prix uqophe isikhathi esiwu-34:40 kwathi uzakwabo u-Elizabeth Hutamo walala isithathu-34:50, bobabili baphuma kwi-Athletics Gauteng North (AGN). UKavanagh usefomini enhle kulezi zinsuku njengoba esanda kungena isithathu kwiBoxer Super Run Durban 5km elandela uKarabo More kulo mjaho owathathwa nguGlenrose Xaba. UTayla uye kulo mjaho evele eyimfivilithi.

“Ngijabule kakhulu ngokudla umhlanganiso kulo mjaho. Inhloso yami bekuvele kuwukunqoba. Bekuyindlela engifuna ukusonga ngayo unyaka. Bekungelula njengoba belina umgwaqo ushelela. Uma uyojika bekufanele uqaphele kakhulu bese wehlisa nesivinini,”kusho uKavanagh.

Ingqwele yabesilisa uMhlanga uthi bekunzima umzila ushelela ngenxa yemvula. Uthi ubazi ukuthi ngeke evule igebe elikhulu. Lo msubathi ngoJanuary uzokube emele izwe kumaWorld Cross Country azokuba seTallahassee okuyidolobha laseFlorida e-USA.
Iqembu labesifazane lesifundazwe libuye nendondo yesiliva kwathi elabesilisa labuya nendondo yethusi.

Isiyonke imiphumela yalo mjaho ihambe kanje: kwabesilisa: Chris Mhlanga 29:00, 2.Musawenkosi Mnisi 29:00, 3.Onalenna Khonkhobe 29:07.
Kwabesifazane: 1.Tayla Kavanagh 33:05, 2.Karabo Mailula 34:20, 3.Elizabeth Hutamo 34:59.