Lakhiwe injejane nabasemnkantshubomvu iqembu eliyomela iKZNA eNorth West
U-Inganathi Ngubo waseMzimkhulu oseke wanqoba iNational Youth Run okungumsubathi osemncane okubhekwe ukuba enze kahle eNorth West. ISITHOMBE. KZN Athletics Facebook page.
IBOPHELE injejana nabasemnkantshubomvu iKwaZulu-Natal Athletics (KZNA) esikwatini sayo esiya emidlalweni ye-Athletics South Africa (ASA) Senior Track and Field Championships ezoqala ngoLwesine asongwe ngoMgqibelo eNorth West.
Abasubathi abazokwenza kahle kulo mqhudelwano bazozibeka ethubeni lokumela iNingizimu Afrika kumaWorld Athletics Championships azokuba ngoSeptember eChina.
UPrudence Sekgodiso okubhekweazidlele amahlanga kwi-800m. Isithombe: Facebook
Kulo mqhudelwano iKZNA izokube imelwe ngabasubathi abawu-26 okungabesifazane abawu-12 nabesilisa abawu-14. Phakathi kwabasubathi okubhekwe ukuba baphakamise ifulegi lesifundazwe kukhona uPrudence Sekgodiso ozokube egijima ngemibala yePhantane Athletics. Usanda kuhlomulela izwe indondo yegolide kwi-800m kumaWorld Indoor Championships ngenyanga edlule eChina.
U-Anele Ndawonde waseMzimkhulu odle ubhedu esigabeni samajuniya kwiHarry Gwala 10km okubhekwe ukuba afunde lukhulu eNorth West. Isithombe: Harry Gwala Municipality Facebook Page.
Usanda kutshele iThe Top Runners ukuthi ufuna ukuba kusongwe unyaka esebeke isikhathi esiwu-1:55 kuleli banga. Okwamanje kubukeka engekho umsubathi ozokwazi ukumelana naye. Kubhekwe ukuba agadulisane noGena Loftsrand weFast Feet oqeqeshwa nguVictor Vaz, lokho okungase kwenza iKZNA ihlomule ngezinondo ezimbili kwi-800m.
Omunye umsubathi okubhekwe ukuba ahlomulele isifundazwe indondo kulo mqhudelwano nguZakithi Nene owenza i-400m ophume kowandulela amanqamu kuma-Olympic Games nyakenye eFrance. Lo msubathi ngeledlule ungene endaweni yesibili kwi-400m eBotswana.
UZAKITHI Nene ozokube ebagadilisa kwi-400m
Omunye umsubathi okubhekwe ukuba aphakamise ifulegi lesifundazwe nguSbongakonke Makhaza obuye nendondo yegolide emidlalweni ye-ASA Youth and Junior Track and Field eCape Town.
Kule sikwati sesifundazwe kunabasubathi abasebancane abenze kahle emidlalweni yeKZNA Youth and Junior Track and Field eMgungundlovu. Okungu-Anele Ndawonde odle umhlanganiso kwiHarry Gwala 10km esigabeni samajuniya nonyaka, u-Inganathi Ngubo baseMzimkhulu abasafunda isikole. Benze kahle kakhulu eMgungundlovu.
USBONGAKONKE Makhaza obuye nendondo yegolide eCape,uthathwe noMandla Mngomezulu oyisekela mengameli kwiKZNA noSandile Mthembu. UMakhaza uzokube ebagadulisa kwi-200m. Isithombe: Facebook.
“Ngijabule kakhulu ngokuthola leli thuba lokumela isifundazwe. Isifiso sami esikhulu ukuya kude nalo mqhudelwano. Ngijabule kakhulu ukuba seqenjini lesigaba esivulelekile. Nginethemba lokuthi kukhulu engizokufunda eNorth West.
“Ngithanda ukubonga nomasipala iHarry Gwala kanye nomqeqeshi wethu ngokuqinisekisa ukuthi siyakwazi ukubamba iqhaza emijahweni ebalulekile esifundazweni. Ngaphandle kwabo besingeke sikwazi ukuba yingxenye yalo mqhudelwano obaluleke kakhulu empilweni yami,” kusho u-Inganathi obe yingqwele yeNational Youth Run ngonyaka odlule. Okuphawulekayo ngeqembu kesifundazwe wukuthi lakhiwe ngabasubathi bamakilabhu amancane. Awabonwa nangokhalo lawa amakhulu.
ULESLIE Mokoena okungomunye wabasubathi othwele amathemba eKZNA
Selilonke iqembu lakuleli lididiyelwe kanje, elabesifazane: Sinethemba Ngema, Sarah Reed, Kirsten Ahrens, Gezelle Magerman, Gena Lofsrand, Dayle Koekemoer, Slindile Hlatshwayo, Prudence Sekgodiso, Ntsoaki Molahloe, Anele Ndawonde, Inganathi Ngubo noRefiloe Karreebos.
Elabwsilisa: Zakithi Nene, Mildo Hlatshwayo, Luyanda Magubane, Sbongakonke Makhaza, Ntokozo Ngesi, Tsepo Tshite, Kwazi Mgobhozi, Johannes Morepe, Leslie Mokoena, Siphokuhle Ndaba, Mome Engelbretch, Vally Usaamah, Philasande Mlambo noLucky Gumede.