Uzovula unyaka ngeMfundo Lushaba uJenet Mbhele oyinxusa leHarry Gwala Marathon
UZOVULA unyaka wakhe kwi-Arnold Mfundo Lushaba Half Marathon uJenet Mbhele waseMzimkhulu okuthe ngoLwesithathu wathulwa njengenxusa leHarry Gwala Marathon ezokuba mhla ka-22 kuMarcch isukela eHighflats isongwe eMzimkhulu TVET College.
UJenet uthulwe njengenxusa kulo mjaho nozakwabo uBongumusa Mthembu noThobani Chagwe okungabagijimi ababeke ebalazweni iHarry Gwala kwezemidlalo. UWillie Mtolo naye obekufanele ethulwe njengenxusa uthe ubambekile.
UJenet onomlando omuhle kwezokugijima kuleli uthe nonyaka ngeke abe yingxenye yeTotalsports Two Oceans okuba ngempelasonto yePhasika eCape Town. Uthi uzogxila kwiComrades Marathon lapho efuna ukuzibhalela owakhe umlando kwezokugijima ngokuba umsubathi wokuqala omnyama wesifazane ukuhlomula ngamagolide amane uma ekwazile ukungena nabokuqala abathathu nonyaka.
“NgeSonto ngizogijima umjaho wami wokuqala iMfundo Lushaba Half Marathon ezokuba seMzumbe. Ngizokuya kuyo ukuzilungiselela iComrades Marathon yanonyaka. Ngeke ngiye kwiTwo Oceans ngenhloso yokugxila kwiComrades. Inhloso yami yokuya kwiComrades ukugqugquzela abanye abasubathi besifazane abaningi abamnyama ukuba bathole igolide kwiComrades. Uma ngilithola bazobona nabo ukuthi lento iyenzeka bese siyangena sibe baningi. Isifiso sami esikhulu nonyaka ukuba ngikwazi ukuthola elinye igolide kwiComrades Marathon.
“Njengoba ngiya kwiMfundo Lushaba ngeSonto ngizokube ngiyidayisa iHarry Gwala Marathon kubona njengoba ngingomunye wamanxusa ayo. Ngisijabulele kakhulu isenzo seHarry Gwala sokungiqoka ukuba yinxusa kanye nabanye ozakwethu,”kusonga uJenet ongene isibili kwiHarry Gwala nyakenye ebeka u-2:49:58.
UJenet useke waphuma endaweni yesine kwiComrades kanti ufisa nonyaka ukungena nabokuqala abayisihlanu kanti unegolide kwiTwo Oceans Marathon.
IMfundo Lushaba izosukela eSibanini Sportsground kanti izinamba zizolandwa ngoMgqibelo kuMasipala eMzumbe nangosuku lo mjaho kusuka ngo-4 Kuya ku-05h30 lapho kusukela khona umjaho eSiibanini. Kuzophindwe kuthathwe nemingenelo kulabo abasale ngaphandle.