Uzobonakala kwiFNB Botswana Golden Grand Prix uLuvo Manyonga obenyamalele
KUBHEKWE uLuvo Manyonga ukuba enze kahle kwiFNB Botswana Goldne Grand Prix ngoMgqibelo ngemuva kwesikhathi eside enyamalele: Isisthombe: Facebook
UZOBONAKALA okukokuqala egijima uLuvo Manyonga kulandela ukunyalala isikhathi eside kulo mdlalo ngenxa yezinkinga ezithinta yena ngqo. UManyonga owenza iLong Jump uzokube eyingxenye yeBotswana Golden Grand Prix ezokuba ngoMgqibelo eGabarone National Stadium, eBotswana.
Lo msubathi umela iNingizimu Afrika emidlalweni eminingi okuhlanganisa ama-African Championships, African Games, ama-World Junior, ama-Commonwealth Games, amaWorld Indoor Championships, amaWorld Athletics Championhsips nama-Olympic Games kanti unendondo yesiliva kuma-Olympic Games ka-2016 eLondon.
Ugcine ukubonakala kakhulu kwezokugijima ngo-2018 njengoba eke wavela ohlelweni lukamabonakude uMzansi Magic olukhuluma ngabantu abagxile kwizidakamizwa. Uvele kwi-‘I blew It’ kanti uvela kuyo nje ubemisiwe kwezokugijima kulandela ukungatholakali kwakhe efunwa yi-Athletics Integrity Unit (AIU) ehlola abasubathi izidakamizwa.
U-Akani Simbine okungomunye wabasubathi abathwele ithemba leNingizimu Afrika ngoMgqibelo eBotswana. Isithombe: Facebook
Kulo mjaho waseBotswana kubhekwe ukuba abuyise udumo lwakhe lwakudlala kwiLong Jump. INingizimu Afrika izokube imelwe ngabasubathi abawu-36 kulo mqhudelwano abazokube bekhiphana inkani emidlalweni ewu-20 eyahlukene. Abasubathi bakuleli baya kulo mqhudelwano wangempelasonto ngenhloso yokuzilungiselela imidlalo ye-Athletics South Africa (ASA) Track & Field Championships ezokuba ngomhla ka-24 kuya ku-26 ku-April eNorth West.
Ngaphandle kukaManyonga kubhekwe lukhulu kwi-100m lapho kukhona u-Akani Simbine ophethe irekhodi lakuleli le-100m ozokube noFerdinand Omanyaka waseKenya ophethe irekhodi lase-Afrika kuleli banga, kube nguKarabo Letebele osanda kushiya u-Omanyala kwi-ASA Grand Prix ngenyanga edlule kuleli. Abanye abazokube bekhona kwi-100m nguBenjamin Richardson noTsebo Matsoso.
Kwi-200m elakuleli libeke ithamba lalo kuLuxolo Adams ozothwala kanzima njengoba ezokube agijima noLetsile Tebogo waseBotswana owenze kahle kuma-Olympic Games nyakenye ebuya nendondo yegolide kwi-200m. Abafuna imininingwane ngemiphumela yalo mjaho bangangena kwi-website ethi: www.athleticssa.org.za.