Izosonga ekhaya leComrades Marathon iHollywoodbets Durban 10k yanonyaka
SEKUBHALISE abasubathi abawu-5000 lwiHollywoodbets Durban 10km yanonyaka ezokuba mhla ka-31 ku-August eKingsmead Cricket Stadium. Kuzokube kungokokuqala nonyaka lo mjaho usongwa eHollywoodbets Kingsmead Cricket Stadium edume ngokuba yikhaya leComrades Marathon uma kusukwa eMgungundlovu kubhekwe eThekwini.
Abadidiyeli balo mjaho batshele abezindaba ngoLwesibili ngesikhathi kwethulwa lo mjaho ukuthi sekubhalise abasubathi abawu-5000 kanti bathi bazokwamukela kuphela abawu-10 000 nonyaka. Lo mjaho ohlelwa yiHollywood Athletics Club ubukeka ukhula ngesikhulu isivinini. Usungulwa ngo-2021 wawungenelwe ngabawu-800 kuphela njengoba manje sebebheke ku-10 000.Le kilabhu iHollywood AC eneminyaka embalwa yasungulwa yiyona enabasubathi abaningi eNingizimu Afrika kanti inemilenze emibili yemijaho yayo. Uma kudlula lo waseThekwini amabombo azobheka eGauteng komunye wemijaho yawo ozokuba ngoSeptember.
IHollywoodbets 10km yiyona ekhokha imali eningi kunayo eNingizimu Afrika njengoba izingqwele zizogoduka no-R37 500 ngokuhlukana kobulili. UManfred Seilder oyimenenja yama-Elite Athlete ukuqinisekisile ngesikhathi kwethulwa lo mjaho ukuthi imiklomelo ngeke ishintshe kanti nasemjahweni waseGoli imali iyefana.
“Nonyaka sihlele ukuba siyishintshe indawo lapho umjaho uphelele khona. Yize ishintshile indawo kodwa umzila womjaho kasiwushintshanga. Sizokwenza ushintsho oluncane lapha nalaphayana. Ngendlela umzila wethu omuhle ngawo sinethemba lokuthi kungenzeka sibone irekhodi lakuleli kulo mjaho okuwu-27:28 owenziwe ngu-Andriaan Wildschutt.
“Kunabasubathi abaningi esixoxa nabo ukuba bazokuba yingxenye yalo mjaho. Nyakenye sithole uTebello Ramakongoana ofike lapha wadla umhlanganiso. Njengoba sizokube sigubha unyaka wesihlanu lo mjaho wasungulwa sihlele ukuba nabasubathi abawu-10 000. Kumanje sekubhalise abawu-5000 lokho okusinika ithemba lokuthi sizokwazi ukuthola lesisibalo esisifunayo,” kusho uSeilder.
Umdididyeli weHollywood AC uLala Cele uthe bajabule kakhulu ngenxa yesasa elikhonjiswa ngabasubathi kulo mjaho. Uthi zolo lokho kade benabasubathi abawu-800 kanti manje sebebheke ku-10000 okuyinto esithokozisa kakhulu.
“Likhulu isasasa elikhonjiswa ngabasubathi ngomjaho wethu. Manje sekubhalise abawu-5000 kuzokuthi uma sesithole abawu-10 000 sizokube sesiyavala. Besicela abasubathi ukuba babhalise ukuze bangasali ngaphandle, ngoba uma sesifika ku-10 000 sizokube sesiyavala. Abasubathi abafuna ukubhalisa bangangena kwi-website ethi: www.webtickets.co.za noma baye ezitolo zakwaPick n Pay kulo lonke elakuleli. Uma benemibuzo bangavakashela ekhasini lethu leFacebook ukuze bathola okunye,” kusho uLala.