Ingqwele yeAbsa Gqeberha ithi ithokozile ngokuphula irekhodi ekhaya
U-Adriaan Wildschutt ophethe amarekhodi amane ele-3000m, 5000m, 10 000m nele-10km alenze ngeSonto kwi-Absa Gqeberha. Isithombe: Facebook
USEPHULE wonke amarekhodi amabanga amafushane akuleli u-Adriaan Wildschutt okuthe ngeSonto waphula ele-10km kwi-Absa Run Your CityGqeberha 10k.
Lo msubathi ozinze e-Amerika uqophe isikhathi esiwu-27:28 kulo mjaho eze kuwona vele ethe ufunaukuphula irekhodi lawo. Irekhodi le-10km beliphethwe nguPreciuos Mashele (27:35) alenza ngo-2023 kuwo lo mjaho. Ufuna ukugijima u-27:00 kwi-Absa Gqeberha u-Adriaan
UWildschutt uphula leli rekhodi nje, uphethe ele-3000m, 5000m nele-10 000m njengoba senze ele-10km.
Nyakenye ungena unombolo 10 kuma-Olympics Games kwi-10 000m eyayingenelwe ngabasubathi abaningi abanohlonzo.⁸
Ingqwele yabesifazane kulo kube nguGati Chacha waseKenya ogijime isikhathi esiwu-31:45 emiswe kabi nguSelam Gebre wase-Ethiopia kwathi uGlenrose Xaba wathatha indawo yesithathu.
Umwngameli ne-Athletics South Africa (ASA) uJames Moloi ehalalile u-Adriaan ngokudla umhlanganiso kwi-Absa Gqeberha. Isithombe:Facebook.
UWildschutt ushaye intambo elandelwa nguVincent Kipkorir waseKenya owenze u-27:47 kwathi uKabelo Mulaudzi wangena unombolo 3 ebeka isikhathi esiwu-27:57.
“Ngijabule kakhulu ngokwenza irekhodi kulo mjaho. Bekuzokuba buhlungu kakhulu kumina ukuhamba indawo ende kangaka ngisuka e-Amerika ngihluleke ukwenza irekhodi kulo mjaho. Isifiso sami bekuwukwenza okhilomitha ngo-2:42 ukuze ngikwazi ukwenza u-27:00 kodwa ku-5km wokuqala akwenzekanga lokho ngenxa yokuthi nomoya ubusigijimisa kanzima.
“Njengoba inhloso yami bekuwukwenza irekhodi ngisebenze kanzima ku-5km wokugcina ukuqinisekisa ukuthi isifiso sami ngiyasifeza. Okunye okungijabulisa nakakhulu ukunqoba phambi komndeni wami. Lokho kukodwa kusho lukhulu. Ngeke ngikhulume iphutha bekunzima,” kusho uWildschutt.
UChacha obe yingqwele kwabesifazane kwi-Absa Gqeberha ngeSonto. Isithombe: Facebook.
UChacha obeqala ukugijima leli banga futhi eqala ukugijima ngaphandle kwezwe lakhe uthe ujabule kakhulu ngokunqoba. Uthi umangele kwazise ubengalindele ukwenza lesi sikhathi njengoba ubeqala ukwenza u-10km.
UMichael Meyer wakwaStillwater Sports okuyiyo ehlela lo mqhudelwano ubongele izingqwele zalo mjaho ikakhulukazi uWildschutt ngokwenza irekhodi laseNingizimu Afrika le-10km.
Uthi kumjabulisa kakhulu ukubona abasubathi abangaphezulu kuka-4000 beyingxenye yalo mjaho wabo.
I-Absa Run Your City inemilenze ewu-5 owaseGqeberha, eCape Town, eThekwini, eTshwane nowaseJohannesburg. Izingqwele zalo mjaho zihlomula ngo-R30 000. Imiklomelo yalemilenze isiyonke ngu-R1.6million.