IBE izingqwele zeRelay iNingizimu Afrika eChina
UGQUGQUZELA abasubathi bakuleli ukuba baqhubeke nokusebenza kanzima u-Akani Simbine ngemuva kokuba iqembu lakuleli le-4x100m libe izingqwele zale libanga emidlalweni yeWorld Relays Championships esongwe ngeSonto eChina.
Iqembu lakuleli le-4x100m lidle umhlanganiso kowamanqamu ngesikhathi esiwu-37:61 lilandelwa yiGreat Britain eqophe u-37.66.
Leli qembu ebeliholwa nguSimbine uBradley Nkoana, uBayanda Walaza noSinesipho Dambile lihluleke ngo-0.04 ukwenza irekhodi lakuleli. INingizimu Afrika ihlomula ngegolide kulo mqhudelwano nje, nyakenye leliqembu le-4x100m labuya nendondo yesiliva kuma-Olympic Games kanti umsubathi omunye umsubathi owayeyingxenye yalo nguShaun Maswanganyi obengekho nonyaka isikhala sakhe savalwa nguDambile obe yingqwele yeSouth Africa National Track & Field ngeledlule eNorth West egijima i-200m.
USimbine obengukaputeni weqembu lakuleli uthe ujabule kakhulu ngokwenza kahle kweqembu lakuleli. BENZA ezibukwayo abasubathi bakuleli kumaWorld Relays eChina
“Ngijabule ngendlela esenze ngalo. Okungijabulisa kakhulu wukuthi leli qembu lakhiwe ngabasubathi abasebancane. Lokho okwenza liqhakaze ikusasa lakuleli. Okubalulekile kubona wukuba bahloniphe bangavuvukalelwa ngamakhanda, ngoba lokho kuzoqeda ngabo.
“Ngijabule ngesikhathi esisenzile ngoba lisinikeze ithikithi lokumela izwe kumaWorld Athletics Championships ngoSeptember eJapan,” kusho uSimbine owuqale kahle unyaka eqopha isikhathi esiwu-9.99 ebangeni lakhe. Kumanje nguyena onesikhathi esisheshayo kwi-100m emhlabeni nonyaka.
Ngaphandle kweqembu likaSimbine nele-4x400m ebeliholwa nguZakithi Nene waKwaZulu-Natal ligile izimanga lidla umhlanganiso.
Liqophe isikhathi esiwu-2:57:50 bephula irekhodi laseNingizimu Afrika obekuwu-2:58:12. Leli qembu elibuye negolide beliholwa nguNene, uGardeo Isaacs, u-Udeme Okon noLythe Pillay.
Elabesifazane le-4x400m lihlomulele izwe indondo yethusi ngesikhathi esiwu-3:28:84. Leli qembu beliholwa nguShirley Nekhubui, uMiranda Coetzee, uPrecious Molepo noZeney Geldenhuys.
Ngokwenza kahle kwabasubathi bakuleli bathole ithuba lokumela elakuleli kumaWorld Athletics Championships eJapan. Amaqembu akuleli aya eJapan ngele-4x100m (Men), 4x400m (elabesilisa nabesifazane) nelixubile le-4x400m.