Unesilonda ngerekhodi lakhe leMarathon uGerda ojoyine iHollywood AC
NGUGERDA Steyn ekhuluma nabezindaba ngemuva kokujoyina iHollywood AC
IBAMBE ufishi omkhulu kwezokugijima eNingizimu Afrika iHollywood Athletics Club okuthe ngoLwesithathu yamemezela uGerda Steyn njengomunye wabasubathi bayo.
Lo msubathi ujoyina iHollywood AC kulandela ukuhlala iminyaka emibili kwiPhantane kanti wajoyina iPhantane evelwe kuthiwa uza kwiHollywood AC eminyakeni.
UGerda kubhekwe lukhulu kuyena kwiComrades Marathon nakwiTwo Oceans Marathon okuyimijaho athi isegazini kuyena ayinqobe nyakenye ngokwehlukana waphinde wenza amarekhodi kuyona. Ngaphandle kokunqoba lo mjaho uphinde wadla umhlanganiso kwi-Om Dei Dam Marathon engena nabasubathi bokuqala abawu-20 kuhlangansiwe ubulili brsilisa nobesifazane.
Ukujoyina kwakhe lekilabhu kwenza abe makhulu amathemba okuthi iHollywood AC izodlisela ogageni amakilabhu amaningi nonyaka ikakhulukazi kwabesifazane. IPurple Team okuyigama eteketiswa ngalo iphethe uCarla Molinaro ongene nabokuqala abalishumi kwiComrades nyakenye, uLoveness Madziva ongene nabokuqala abathathu kwiTwo Oceans nyakenye, u-Irvete van Zyl osanda kumemezela ukuthi uzogijima iComrades yakhe yokuqala nonyaka.
“Ngijabule kakhulu ngokuba yingxenye yeHollywood AC okungenye yamakilabhu akhulayo kwezokugijima eNingizimu Afrika. Okungenze ngajoyina lekilabhu ngithanda indlela ehleleke kahle ngayo, nangendlela eyenza ngayo izinto.
“Nonyaka ngizogxila kakhulu emijahweni engaziwa kuyona okuyiTotalsports Two Oceans neComrades Marathon. Ngizimisele ukwenza kahle. Ngeke ngiphawule ngerekhodi noma ama-rekhodi kuyo lemijaho. Uma ngilenza kuzokuba yibhonasi, okubalulekile wukunqoba. Ekupheleni konyaka ngizokuya kogijima iMarathon phesheya kwezilwandle,” kusho uGerda.
Uqhube wathe ngeke aphawule ngamaWorld Athletics Championships azokuba maphakathi nonyaka eTokyo, Japan ngoba kasikamenyezelwa isikwati esiya kuwona. Okunye akuphawulile lo msubathi wukuthi ufuna ukubuyisa irekhodi lakhe leMarathon aliphathe ngo-2021 kwathi nyakenye lahlwitha uGlenrose Xaba egijima iCape Town Sanlam Marathon. Uthi okumphatha kabi wukuthi uliphathe isikhathi esincane. Uthi uma kungenzeka ekwazi ukuphinde alenze ufuna lihlale iminyaka eminingi.
UMorgan Shandu ongumengameli weHollywood AC uthe bajabule kakhulu ngokuthola uGerda. Uthi into abayifuna kakhulu wkuba abasubathi babo bangene nabokuqala abathathu emijahweni emikhulu kuleli. Uthi ufuna ukubona i-podium ihlobiswe ngemibalo yabo e-purple.