INGQWELE yeHollywoodbets Durban 10km ithi ngeke ibe yingxenye yamaWorld Athletics Championships
UGLENROSE Xaba esanda kuqeda Hollywoodbets Durban 10km. ISITHOMBE: BackTrack Sports
SITHUSE abaningi isinqumo sikaGlenrose Xaba oyingqwele yeHollywoodbets Durban 10km sokuthi ngeke abe yingxenye yamaWorld Athletics Championships azoqala mhla ka-13 asongwe mhla ka-21 kwephezulu eToyko.
Lezi zindaba uGlenrose osubathela iBoxer uzitshele abezindaba ngesikhathi edla umhlanganiso kwiHollywoodbets Durban 10km ngesikhathi esiwu-31:34 okuyirekhodi lo mjaho ehluleka ngemizuzwana embalwa ukwenza irekhodi lakhe le-10km. Uthi ubone sekusele u-400m ukuthi ngeke esakwazi ukwenza irekhodi lakhe kulo mjaho obungenelwe ngabasubathi abawu-12 000 ukhokha isamba sika-R37 500 kwizingqwele.
UGLENROSE kwisithangami sabezindaba yeHollywoodbets Kingsmead Cricket Stadium
UGlenrose unqoba lo mjaho usanda kudla umhlanganiso kwi-Absa Run Your City Tshwane. KwiHollywoodbets Durban 10km ushaye intambo elandelwa yingqwele yanyakenye uNeheng Khatala waseLesotho ongene isibili ngesikhathi esiwu-31:44 wahlomula ngo-R30 000 kwathi uFridah Ndinda waseKenya walala isithathu ngesikhathi esiwu-33:05 wahlabana ngo-R27 500.
UGlenrose akayi kumaWorld Championships ekuqaleni konyaka watshela abezindaba ukuthi ufuna ukuya kulo mqhudelwano kodwa enze i-5000m okanye i-10 000m kwazise ubevele esenzile isikhathi kwiMarathon ngesikhathi enqoba iSanlam Cape Marathon nyakenye eqopha u-2:22:22 okuyirekhodi lakuleli.
“Ngajabuba kakhulu ngesikhathi ngenza irekhodi leMarathon nyakenye okwabe kuyisikhathi esinginika ithikithi lokuya kumaChampionships. Isifiso sami esikhulu bekuwukwenza i-5000m okanye i-10 000m.
“Sihlale phansi neManager yami kanye nomqeqeshi savumelana ngokuba ngihoxe ekubeni yingxenye yeqembu lesizwengenxa yokuthi kangiziqeqeshanga ngokwanele iMarathon. Ngakhoke ngeke ngikwazi ukubamba iqhaza kuwo,” kusho uGlenrose osubatha ngamibala yeBoxer.
IZINGQWELE zeHollywoodbets Durban 10km ophakathi nguGlenrose onqobile kanti uphahlwe nguNeheng Khatala weHollywood Athletics Club waseLesotho ongene isibili noFridah Ndinda waseKenya ongene isithathu.
Lo msubathi uqhube wathi ngenyanga ezayo uzokube eyingxenye yeSouth Africa National Cross Country Championships lapho ezokube enza khona i-10km. Uthi uya kulo mjaho ukuyovikela isicoco sakhe.
“Ngempelasonto ngiya kogijima iCross Coutry eMpumalanga. Ngiyofaka amandla ukuzilungiselala iSpar esizokuba ngenyanga ezayo eJozi. Ukuya kwami kwiCross Counrty ukuyofaka amandla ukuze ngikwazi ukuqopha umlando ngokukwazi ukuvikela isicoco sami seSpar Grand Prix,” kuphetha uGlenrose.