Kukhonye iXcel Running Club neBlack Diamond kwiChillie Lifestyle 10km
USIYABONGA Ndlovu weXcel Running Club noBusisiwe Chamane weBlack Diamond babe izingqele zeChillie Lifestyle 10km ebingeSonto ekuseni eKings Park Athletics Stadium.
UNdlovu osanda kudla umhlanganiso kuMsinga 10km ushaye intambo ngesikhathi esiwu-28:29 emiswe kabi ngu-Adam Lipschitz osubathela iSocial Runners Club ongene isibili ngesikhathi esiwu-29:30 kwathi uCwenga Nose ogijima ngemibala yePhantane wathatha indawo yesithathu eqopha u-30:40.
Kungena igama lika-Adam nje, ikilabhu yakhe iSocial Runners Club izokube isingethe umjaho wejubena mhla ka-28 kuJune. Lo mjaho uzokube uphelele ngaphakathi eMoses Mabhida Stadium, kuzokube kuyi-21km, i-10km, i-5km ne-1mile lapho kumenywe khona osaziwayo kuyona.
Phakathi kosaziwayo okulindeleke ukuba bebe yingxenye yeMile nguFelix Hlophe, u-Ayanda Ntanzi, abadlali bebhola lo mboxo, abekhilikithi nezintatheli. Abafuna ukuba yingxenye yalo mjaho bangangena kwi-website ethi: www.eventtiming.co.za.
Uma singena kumjaho iChillie Lifestyle, uBusisiwe uqophe isikhathi esiwu-35:43 kwathi indawo yesibili yawela kuNontokozo Mkhize oqophe u-37:43 kwathi ijuniya u-Alexis Hewitt wangena isithathu eqopha isikhathi esiwu-39:54.
Ngaphandle komjaho weSocial Runners Club abasubathi abaningi kubhekwe ukuba bakhiphane amakhizane kwi-Absa Durban Run Your City ezokuba mhla ka-13 kwezokuthwasa eThekwini. IBlack Diamond ikuqinisekisile ukuthi umsubathi wayo uBusisiwe uzokube eyingxenye yalo mjaho kanti noNdlovu uthe ulangazelele indawo yesithathu kwi-Absa yaseThekwini.
Lo mjaho ubuzinyaziswe nguSihle Zikalala oke waba ngundunankulu waKwaZulu-Natal manje uyisekela nngqongqoshe kwaPublic Works and Infrastructure. UZikalala unxenxe abantu ukuba bazihlanganise nezemidlalo ukuze bahlale beyimiqemane. Uthi ukuzivocavoca kuyasiza ukulwa nezifo.
Isiyonke imiphumela yalo mjaho ihambe kanje, kwabesilisa: 1.Siyabonga Ndlovu 28:29, 2.Adam Lipschitz 28:30, 3.Cwenga Nose 28:40.
Kwabesifazane: 1.Busisiwe 25:43, 2.Nontokozo Mkhize 37:43, 3.Alexis Hewitt 39:54. Abafuna eminye imiphumela bangangena kwi-website ethi: www.eventtiming.co.za