KUCHANASE abasubathi beBoxer kwi-Absa Run Your City Cape Town
INGQWELE ye-Absa Your City Cape Town 10k uKabelo Mulaudzi eyoshaya intambo ebalekela uKamohelo ngemuva kwakhe.
UKABELO “Mr Podium” Mulaudzi noGlenrose Xaba babe izingqwele ze-Absa Run Your City Cape Town 10k ngeSonto. Ngokunqoba kwabo bobabili bazihlomulele ngo-R30 000 ngokwehlukana kobulili. UMulaudzi ojwayele ukuhlala engena nabokuqala abathathu kulo mjaho ushaye intambo ngesikhathi esiwu-27.49 enza ngcono isikhathi sakhe esidlule u-27:45 kanti uGlenrose odume ngelika-Supercharge uqophe u-32:00 esezihambela yedwa
IZINKUMBI zabasubathi abebeyingxenye ye-Absa Run Your City Cape Town 10k ngeSonto
UMulaudzi osubathela iBoxer uze kulo mjaho evele eyimfivilithi yize egcine ukudla umhlanganiso komunye wemilenze ngo-2023. Ngemuva kwalokho ubehlala engena nabokuqala abathathu. Lokho osekwenze waqanjwa ngokuthi ngo-“Mr Podium”. I-Absa inemilenze eyisihlanu. Owokuqala ubuseGqeberha kanti lo onqontshwe nguMulaudzi ngowesibili.
Olandelayo uzokuba seThekwini ngoJuly bese kulandela owaseTshwane kugcine owaseJohannesburgh. Umjaho waseCape Town ubunzima kakhulu bekunzima ukuqagula ukuthi ngubani ongase adle umhlanganiso njengoba ububophele nabasubathi bangaphandle kwesifundazwe. UMulaudzi unqobe lo mjaho elandelwa nguKamohelo Mofolo waseLesotho odle umhlanganiso emlenzeni waseTshwane nyakenye kwathi indawo yesithathu yathathwa nguStephen Mokoka obengebhekwe muntu ukuthi angakwazi ukungena nabokuqala abathathu.
Indawo yesine ithathwe ngu-Elroy Gelant osanda kuzakhela igama lakhe kwezokugijima ebeka irekhodi elisha laseNingizimu Afrika leMarathon (2:05:35) ephula u-2:06:33. Ngaphandle kuka-R30 000 awutholile uMulaudzi uphinde wagixabezwa ngo-R40 000 ngokwenza isikhathi esingaphansi kuka-28:00 kanti nasesigabeni sabesifazane kube ngokufanayo uGlenrose ehlabana ngo-R70 000 okuwu-R30 000 wokuba yingqwele no-R40 000 ngokwenza u-32:00.
BEKUSACINENE utshumo kwabesilisa kwi-Absa Cape Town
“Ngijabule kakhulu ngokuphinda ngedle umhlanganiso kwi-Absa Series. Benginesifiso sokwenza ngcono isikhathi sami se-10km eGqeberha kodwa ngagcina ngingakwazanga. Bekuyisifiso sami esikhulu ukudla umhlanganiso kulo mjaho. Ngike ngaba novalo ngobona uKamohelo ezama ukuvala igebe. Bengimqaphile. Ngize ngakwazi ukusenza lapha eCape Town. Umjaho esengiwubhekile umlenze wesithathu we-Absa ozokuba seThekwini ngoJuly. Nginethemba lokuthi nakhona ngizokuba nomjaho omuhle,” kusho uMulaudzi. Bobabili uMulaudzi noGlenrose basubathela iBoxer.
UKamohelo waseLesotho osanda kujoyina iXcel Running Club uqophe isikhathi esiwu-27:53 uhluleke ngomzuzwana owodwa ukwenza irekhodi lezwe lakhe.UGlenrose ophethe irekhodi lakuleli le-10km alenze nyakenye kwi-Absa eThekiwini uthe ujabule ngokuba yingqwele yalo mjaho. Uthe ubeqala ukungena nabokuqala abathathu eCape Town.
UGLENROSE Xaba eshaya intambo kwi-Absa Run Your City Cape Town 10k. IZITHOMBE: Mark Sampson
Uthi umjaho ubunzima ungenelwe ngabasubathi abaningi abasezingeni eliphezulu.Lo mjaho ubungenelwe ngabasubathi abawu-15 000. Isikhulu sakwaStillwater Sports uMichael Meyer ubongele uGlenrose noMulaudzi ngokuba izingqwele zalo mjaho.