BELIPHEZULU izinga kwiNkandla May Rural Horseracing esixhaswe uMnyango wezeMidlalo
USEBHEKWE ukuba azibonakalise ukuthi usejwayelene nojokhi wakhe uNxakanxaka obe yingqwele yeNkandla May Rural Horseracing emjahweni omkhulu ngoMgqibelo eNkandla. Lo mjaho wamahhashi ohlelwe iNkandla Municipality uqale ngo-2016 kusazidlalela umphakathi wodwa kuthe ngonyaka olandelayo kwangenelela umasipala. Ngaleso sikhathi iNkandla yabe iholwa nguThami Ntuli njengemeya osengundunankulu wesifundazwe.
INkandla May ibinemijaho ewu-11 kanti bekukhona nemibili yabesifazane. Lo mdlalo ubhulelwe amazolo nguMiss noMr Nkandla kanti abanqobile kuwona bazothola ithuba lokumela iNkandla kuMiss nakuMr Nkandla ozokube uyingxenye yeKing Cetshwayo Rural Horseracing. Ngokunqoba kwakhe uNxakanxaka ugoduke nesamba sika-R50 000 kwathi Amazondo angene isibili ahlomula ngo-R40 000 okungamahhashi aseMzinyathi.
Indawo yesithathu ithathwe nguColchester waseMzinyathi yena ohlomule ngo-R30 000. Umnyango wezemidlalo ufake imali ecela kwisigidi kulo mdlalo.Nyakenye ingqwele yalo mjaho kwaba nguMbayimbayi, owasuka kulo mjaho wanqoba iDundee, iKing Cetshwayo, iHarry Gwala ngokwehlukana. Leli hhashi (Mbayimbayi) lenza imali ecela kwisigidi nyakenyeLo mjaho ubuhanjelwe ngundunankulu wesifundazwe nongqongqoshe wezemidlalo uMntomuhle Khawula.
UKhawula uthe umnyango wabo uthunywe ngundunankulu, uthi wabatshela ukuthi uhulumeni kawungeni kuwona kufanele sispndele. Í “Ndunankulu njengoba sithunywe nguwena siyakwenza lokho owathi asikwenze. Nyakenye ucelile ukuba singene kulo mcimbi, siwuthuthukuse. Ngiyathembisa ukuthi sizokwenza lokho njengoba usithumile. Umjaho waseKing Cestshwayo sizokube siyingxenye yawo siwumnyango, iDundee July, owaseMgungundlovu, iSummer Cup neminye njengokucelwa nguwe.
Sizoqhubeka sibe yingxenye yayo njengobakucelwa nguNdunankulu. Ngiyababongela bonke ojokhi abenze kahle. Ngiyathemba ukuthi sizohlangana nabo eDundee njengoba seziqalile izinhlelo zayo,” kusho uNgqongqoshe uKhawula. UNdunankulu uthe uthokoza kakhulu ukuthi lo mdlalo awuthanda kakhulu uyathuthuka. Uthi lo mdlalo usiza kakhulu ukuthuthukisa umnotho waseNkandla. Uthi ngokuba khona kwalo mjaho kunabantu abalala bedlile kanti izindawo zokulala bezigcwele zichichima.
“Ngithanda ukubonga iMeya yaseNkandla uNonhlanhla Nzuza. Indlela owenze ngayo meya ingithokozise kakhulu. Ngiyafisa ukuwubona lo mjaho undlondlobala. Lo mdlalo waqala kuzidlalela abantu bendawo kuthe ngokuhamba kwesikhathi uMkhandlu waseNkandla wangenelela.
Ngicela iNkandla ngokubambisana noMnyango wezemidlalo bawuthuthukise lo mjaho uze ufike ezingeni leDundee July. Lokho kuyokwenzeka ngokusebenza ngokubambisana,” kusho uNdunankulu. UNdunankulu ucele osomatekisi bendawo ukuba basize bathuthe abantu abazobukela lo mdlalo. Uthi ukwanda kwezibukeli kuzowuthuthukisa kakhulu.