UMSUBATHI waKwaZulu-Natal uZakithi Nene waseMnambithi uthwele amathemba eNingizimu Afrika njengoba kuzokuthi ngoLwesine ntambama agijime kowamanqamu kumaWorld Athletics Championships aqhubekayo eJapan.
Lo ovundululwe kumaSalga Games okuyimidlalo edlalwa minyaka yonke ngokuphela konyaka esifundazweni uzokube ebagadulisa kwi-400m. Lo msubathi ube nonyaka omuhle njengoba enqobe imidlalo eminingi.
Phakathi kwayo kukhona amaSA National Track and Field abesekuqaleni konyaka eNorth West. Akagcinanga kapho njengoba ebuye wanqoba eminye imilenze yeDiamond League waphinde wabuya nendondo kumaWorld Cross Country Championships ekuqaleni konyaka.
UNene udlulele kowamanqamu ngesikhathi esiwu-44:20. Isikhathi asenzile kube ngesesihlanu esisheshayo kwabaya kowamanqamu. Umsubathi waseBotswana uCollen Kebinatshipi wenze isikhathi esiwu-43.61 okuyisikhathi esisheshayo nonyaka emhlabeni nonyaka.
UTsepo Tshite ungene unombolo 9 kowamanqamu kwathi umpetha womhlaba kwi-400m uWayde van Niekerk udlulele kowandulela amanqamu kwi-200m. UWayde ophethe irekhodi lo mhlaba ke-400m uzokube ebagadulisa noSinesipho Dambile ngo-14:02, kuthi uPrudence Sekgodiso noCharne du Plessis badlale eyokuhlunga kwi-800m ngo-12:58 kuthi ifinal ye-400m kaNene ibe ngo-15:10.
