Uzobonakala kwiComrades Marathon onqobe i-100km
SELUMENYEZELIWE usuku lweComrades Marathon yangonyaka ozayo okuzokube kuyi-UpRun isukela eThekwini isongwe eMgungundlovu.
Umjaho wanonyaka kubhekwe ukuba uhehe izinkumbi zabasubathi njengoba kuzokube kungoka-99 wandulela omkhulukazi ozokuba ngo-2027. IComrades Marathon Association (CMA) imemezela usuku lwalo mjaho nje, isanda kumemezela umdidiyeli womjaho omusha uSue Forge.
USue uqokwa nje, kuzokuthi maduze iCMA imemezele izinhlelo zomjaho wayo wangonyaka ozayo. Lesi sikhulu siza kulo mjaho nje siphethe ulwazi olunzulu ngokuphathwa kwemijaho emikhulu.
Umdidiyeli omusha weComrades Marathon uSue
Besiyingxenye ye-Absa Run Your City Series, iSpar Women Challenge neminye imijaho emininga efana neSanlam Cape Town Marathon.
IComrades Marathon yangonyaka ozayo kubhekwe ukuba ishube kakhulu njengoba kubhekwe abasubathi abasha ukuba bashibise kakhulu. Abalandeli bezokugijima abaningi bamagange ukubona ukuthi uzokwenzenjani uSibusiso Kubheka kwiComrades.
UKubheka usematheni kwezokugijima emhlabeni njengoba esanda kuqopha umlando eba ngumsubathi wokuqala emhlabeni ukugijima i-100km ngaphansi kwamahora ayisithupha. Lo msubathi oqeqeshwa nguXolani Mabhida ukuqinisekisile ngesikhathi ekhuluma noMNOTHO NEWS ukuthi uzokube egijima iComrades Marathon yakhe yokuqala nonyaka.
USibusiso Kubheka onqobe i-100km ozokube enza iComrades Marathon yakhe yokuqala ngonyaka ozayo
Umjaho obugijinywa yilo msubathi ubuxhaswe ngabakwanardo Ring Adidas 100km ebengeledlule e-Italy okungabaxhasi bakhe. Ukwenza kahle kukaKubheka kwenza abe makhulu amathemba okuthi ungomunye wabasubathi ozokwenza kahle kwiComrades yakhe yokuqala. Kulo mjaho kubhekwe ukuba athwale kanzima uTete Dijana oyingqwele, uPiet wiersmawaseNetherlands ongene isibili kuTete, uBongumusa Mthembu oluthemba lesifundazwe kwiComrades Marathon nabanye.
Yize eqophe umlando uKubheka kuze kube yimanje, i-Athletics South Africa (ASA) kuthiwa kayikaze ikhiphe isitatimende sokubongela lo msubathi.
ICMA ithe abasubathi abahlale bebheke ezonkundleni zabo zokuxhumana ukuthola ukuthi umjaho wangonyaka ozayo uzokwethulwa nini noma bangene kwi-website ethi: www.comrades.com ukuthola konke abakudingayo ngalo mjaho.