BAKHALA ngemiklomelo abebeyingxenye yePrince Mangosuthu Marathon
BADUNGUKUZA oswini abasubathi abebeyingxenye yePrince Mangosuthu Ultra Marathon njengoba bekhala ngokuthi kuze kube yimanje abakakayitholi imiklomelo yabo.Lo mjaho webanga lika-52km, 21km no-10km uhlelwa iBiggarsberg Athletics Club. U xhaswe uMzinyathi Municipality.
Izingqwele ze-52kmm zihlomule ngo-R150 000 kanti ku-21km bekubangwa isicoco sika-R50 000.Ingqwele yabesilisa kwi-52km kwaba ngu-Onalenna Khonkobe osubathela iNedbank emiswe kabi ngu-Ayanda Ngcobo weseMsinga osubathela iXcel Running Club kwathi uSiboniso Skhakhane wangena isithathu.Kwabesifazane ingqwele kwaba nguShelmith Muriuki wasekenya, uJenet Mbhele waseMzimkhulu walala isithathu.
U-Onalenna Khonkobe odle umhlanganiso kwiPrince Mangosuthu Ultra Marathon
Bobabili laba basubathi bahlomule ngezindondo zegolide kwiComrades Marathon yanonyaka enqontshwe nguGerda Steyn kwabesifazane kwathi uTete Dijana wanqoba kwabesilisa. Indaba yokungakhokhelwa kwabasubathi ababeyingxenye yePrince Mangosuthu ebingo-April zivezwe ngu-Ayanda Ngcobo ekhasini lakhe leFacebook.
Baningi abakhombise ukungasenameli isenzo sabadidiyeli balo mjaho wokuhlonipha umntwana waKwaPhindangene ongasekho emhlabeni.Imiklomelo yabasubathi kulo mjaho icela ku-R900 000.USiyabonga Ngobese weBiggarsberg Athletics utshele UMNOTHO NEWS ukuthi bayalwazii udaba lwabasubathi uthi baphezu kwalo.
“Ngicela ukuxolisa kakhuku kubasubathi. Ngolwazi enginalo sasibatshelile ukuthi imiklomelo yabo bazoyithola ngokuphela kukaJuly njengoba usongwa ngesonto elizayo. Ngikhulumile nemeya nabathintekayo kumasipala bangithembisa ukuthi bazoqala maduze ukukhokhela abasubathi. Siyikilabhu siyabahlonipha abagijimi. Bazoyithola imali yabo maduze.
Siyaxolisa kakhulu ngokuhamba kwesikhathi singakhokhile. Ngokwesithembiso semeya sizoqala ukukhokha njengoba kuzosombuluka isonto,” kusho uNgobese.