IKHUZA ibuya iZululand District Marathon

IKHUZA iZululand District Marathon nonyaka ezokuba mhla ka-19 ku-April igijinywa phakathi kuLundi neNongoma. Lo mjaho ugcine ukuba khona ngo-2019 ngesikhathi unqontshwa nguNkosikhona Mhlakwana.

Kuzokhumbuleka ukuthi imeya yaseZululand uMichael Khumalo neyaseBaqulisini uKhehla Mkhwanazi bakuphakamisa kuMnotho News nyakenye ngesikhathi bekwiNkamana Race Half Marathon ukuthi bangakujabulela ukuba iZDM ibuye. Bathi ezemidlalo ziyasiza kakhulu ukugcina abantu beyimiqemane kanti lo mjaho (ZDM) isiza abasubathi ukuba benze izikhathi zokubamba iqhaza kwiComrades nakwiTwo Oceans Marathon ngokwehlukana.

UBheku Zwane ukuqinisekisile ukuthi lo mjaho uyabuya nonyaka.
“Njengoba siwufakile ohlwini lwemijaho yesifundazwe siyakuqinisekisisa ukuthi uyabuya nonyaka. Sibonile ukuthi abasubathi bebewuthakasela kakhulu. Sizozokuba nomhlangano kusasa nabantu abazosisiza ukuwusingatha, nokuyilapho sizokhipha khona yonke imininingwane ngomjaho.

UNkosikhona Mhlakwana oke waba yingqwele yeZDM Marathon:ISITHOMBE: Facebook

Sizobhunga nangokuthi uzokuba i-Up Run okanye iDown Run kwazise phambilini ubuhlala uhambisana neComrades Marathon ukusiza abagijimi abaya kuyona. Abagijimi abalinde imininingwane iyeza maduze,” kusho uZwane.

Lo mjaho ubungeminye ethandwa ngabagijimi njengoba phambilini izingqwele bezigoduka nemiklomelo yezimoto ngokwehlukana kobulili. Phakathi kwabasubathi asebeke bawunqoba lo mjaho nguNkosikhona Mhlakwana, uVictor Ngubelanga, uProdigal Khumalo, uLoveness Madziva ukubala nje abambalwa.