UGLENROSE Xaba onqobe iBoxer 5km ulobizela ukwenza ngcono isikhathi sakhe seMarathon kwiValencia
URYAN Mphahlele uqophe irekhodi elisha leBoxer Super Run 5km ebingeSonto ekuseni edla umhlanganiso ngesikhathi esiwu-13:37 ecisha u-13:39 owenziwa nguPrecious Mashele nyakenye.
Umjaho wanonyaka ubungenelwe ngabasubathi abawu-5000 kanti bekuqala ukuba isheshe ivalwe imingenelo yalo mjaho ohlelwe iStillwatersports.
Ingqwele yabesifazane kube ngumsubathi weBoxer Athletics Club uGlenrose Xaba oshaye intambo ngesikhathi esiwu-15:27. Lo mjaho ubunzima kubo bobubili ubulili njengoba zombili izingqwele zisizwe ukuvulela ngejubane sekubhekwe entanjeni.
UGlenrose osefomini enhle kakhulu nonyaka ushaye intambo elandelwa yingqwele yanyakenye uKarabo More onguzakwabo oqophe isikhathi esiwu-15:34 kwathi uTayla Kavanagh wavala indawo yesithathu eqopha u-15:35.
“Umjaho ubumuhle kakhulu kakhulu futhi ngiwuthakasele kakhulu. Ukunqoba kwami kungijabulise kakhulu njengoba ngizilungiselela iValencia Marathon, eSpain mhla ka-7 kuDecember. Isivinini enginaso singithokozisa kakhulu. Nginethemba lokuthi ngizokwenza kahle eSpain. Isifiso sami eikhulu ukwenza ngcono isikhathi sami seMarathon okuwu-2:22. Uma ngingenza kangcono lesi sikhathi ngingathokoza kakhulu,” kusho uGlenrose osanda kuba yingqwele yeSpar Grand Prix Series.UGLENROSE ukhale wemuka nesicoco eSpar
Nasesigabeni sabesilisa uMphahlele unqobe kunzima njengoba ubebhekene nabasubathi abasezingeni eliphezulu. Lo msubathi unqoba lo mjaho ebhekene noKabelo Mulaudzi othathe indawo yesibili esala ngemizizwana emibili kwingqwele kwathi u-Elroy Gelant obuya kumaWorld Championships ophethe irekhodi lakuleli leMarathon wathatha indawo yesithathu.
Ekhuluma nabezindaba ngemuva komjaho uMphahlele uthe” Ngithokoze kakhulu ngokunqoba. Umjaho ubunzima, ngibhekene nabasubathi abasezingeni eliphezulu. Umjaho ungiphathe kahe futhi ngiwuthakasele. Kade ngagcina ukwenza ibanga lika-5km. Ngijabule ngokunqoba.
“Ngizitshele umjaho usasuka phansi ukuthi ngifuna kube ngowami. UGelant ungithwalise kanzima njengoba ngihambe naye usasuka waze wayophela elapha ngemuva kwami. Kuthe uma sesibheke ngasentanjeni ngabona sekuqhamuka uMulaudzi ezama ukuvala igebe. Ngiyacabanga ijubane enginalo le-1500m yilona elingisebenzele.”
UMphahlele unqoba lo mjaho nje, uphuma kumaWorld Athletics Championships lapho abebagadulisa khona kwi-1500m. Lo msubathi ubonakala engena eza kahle kwiRoad Running njengoba ephuma kwiTrack. Usanda kuqopha isikhathi esingaphansi kuka-28:00 kwi-Absa Durban 10k.
Isiyonke imiphumela yalo mjaho ihambe kanje, kwabesilisa:1.Ryan Mphahlele 13:37, 2.Kabelo Mulaudzi 13:39, 3.Elroy Gelant 13:42, 4.Musawenkosi Mnisi 13:49, 5.Chris Mhlanga 13:51, 6.Zenzile Pheke 13:54, 7.Bongelani Mkhwanazi 13:54, 8.Simon Sibeko 13:56
Kwabesifazane: 1.Glenrose Xaba 15:27, 2.Karabo More 15:34, 3.Tayla Kavanagh 15:35, 4.Carina Viljoen 16:00, 5.Kyla Jacobs
16:13, 6.Cacisile Sosibo 16:23, 7.Danielle Verster 16:40, 8.Bathobile Mhkize 16:49
