ABASUBATHI base-Afrika babukise abakuleli izithende kwiDurban International Marathon

UFELIX Kiprotich waseKenya ophakathi nendawo obe yingqwele yeDurban International Marathon ukakwe nguGodwin Katakura okwesobunxele ongene isibili noBlessing Waison okwesokudla othathe indawo yesithathu bobabili abaseZimbabwe.

ABASUBATHI base-Afrika babukise ngabaseNingizimu Afrika kwiDurban International Marathon ebingeSonto isukela eSiphingo yasongwa ePeople’s Park, eMoses Mabhida. Lo mjaho bekungowokugcina wokuzibekisela indawo kwiComrades Marathon ezokuba mhla ka-8 kuJune isukela eMgungundlovu isongwe eThekwini. 

Izingwele zalo mjaho kube nguFelix Kiprotich waseKenya owenze isikhathi esiwu-2:10:45 elandelwa nguGodwin Kataruka waseZimbabwe owenze isikhathi esiwu-2:11:02 kwathi uBlessing Waison wathatha indawo yesithathu ngo-2:11:51. Lo mjaho ubuhlanganise neCAA Championships ukunikezela abasubathi base-Afrika ithuba lokubamba iqhaza kumaWorld Athletics Championships azokuba ngoSeptember eJapan.

u-EMANE Hayile wase-Ethiopia odle ubhedu kwabesifazane

Esigabeni sabesifazane kunqobe u-Emane Seifu wase-Ethiopia ngo-2:31:45 elandelwa ngu-Alina Armas waseNamibia kwathi uFortunate Chidzivo waseZimbabwe walala isithathu ngesikhathi esiwu-2:33:30 enza ngcono isikhathi sakhe seMarathon ngemizuzu emibili.

Izingqwele zeminyaka eyedlule kulo mjaho zifike zavelela emhlabeni. Ingqwele yango-2022 u-Isaac Mpofu waseZimbabwe waya emidlalwni yamaWorld Athletics Championships wafike wangena nabokuqala abalishumi. UTebello Ramakongoana waseLesotho onqobe ngo-2023 uye kumaWorld Champs wangena nabokuqala abalishumi kanti nyakenye uphinde wangena nabokuqala abalishumi kuma-Olympics Games abeseFrance.

UYISHAYE kanje intambo uFelix kwiDurban International Marathon

UKiprotich ukhombise kudlulwa ku-20km ukuthi uyasifuna isicoco salo mjaho. Ubezihambela yedwa kusuka ku-20km waze wayoshaya intambo.

“Umzila walo mjaho ubumuhle kakhulu. Nesimo sezulu besisihle. Ngijabule ngesikhathi engisenzile ukube bekukhona abantu ebengigijima nabo besizolenza irekhodi lo mjaho. Ngibulawe ukuthi bengigijima ngedwa. Bengizokwenza isikhathi eingcono ukube besibaningi siphushana. Kulo mzila singenzeka isikhathi esiwu-2:07. Ngiyabuya ngonyaka ozayo ukuzovikela isicoco sami,” kusho uKiprotich.

USteve Mkasi obehlela lo mjaho uthe ujabule ngendlela umjaho ohambe kahle ngayo. Sibonga kakhulu kubaxhasi balo mjaho ngokuqhubeka basixhase. 

“Ngijabule kakhulu ngendlela umjaho ohambe ngayo. Ngiyawubona u-2:07 wenzeka lapha eThekwini. Kuzofanele sibheke ukuthi singawushintsha yini noma siwuwenze ngoJuly ukuthola izikhathi ezizoheha abaxhasi. Ukube uKiprotich kukhona abantu abehambisana nabo ngabe sibone isikhathi esingcono kakhulu namuhla. Sihlushwa ukuthi asinamali ngabe silanda ama-pace setter amaningi ukusiza abagijima ukuba benze izikhathi ezingcono.

UJOBO Khatoane noTayla Kavanagh ababe izingqwele ze-10km ngokuhlukana kobulili.

“Okunye okufanele sikubheke ukuba sizame ukushintsha umzila wethu ngasePhoyinti ngoba ziningi izimoto. Baningi abantu abaphazamisekile phakathi komgwaqo uShepstone nasePhoyinti,” kusho uMkasi. 

UJobo Khathoane noTayla Kavanagh badle umhlanganiso kwi-10km ngokuhlukana kobulili. Lo mjaho ubusakazwa bukhoma kuSABC.