UREGHEN no-Annie bayizingqwele zaseNingizimu Afrika zeMarathon
UREGHAN Magwai obe yingqwele yeDurban International Marathon ehalaliselwa iTheku: ISITHOMBE: FACEBOOK
UREGHEN Magwai waseNingizimu Afrika no-Alemitu Lema wase-Ethiopia babe izingqwele zeDurban International Marathon eqale eSiphingo yasongwe ePeoples Park. Lo mjaho bekungowesithupha nonyaka kanti ubuhlanganise namaSouth Africa National Marathon Championships.
UMagwai osubathela iHollywood Athletics kulo mjaho ubemele isifundazwe sakhe i-Athletics Gauteng North (AGN). Unqobe lo mjaho kunzima njengoba edlule uCijimpi Moloi wePhantane Athletics Club sekubhekwe ku-37km. Lo mjaho ubuhlanganise ne-10km.
Okugqamile kulo mjaho abasubathi abaningi baqophe amaPB (Personal Best) kuwona kubo bobubili ubulile. UMagwai uqophe esiwu-2:11:20 elandelwa nguMoloi owenze u-2:11:31, indawo yesithathu yathathwa nguSimon Sibeko ongene ngo-2:12:11, uThabang Mathebula wangena isithathu ngo-2:13:55 enza ngcono isikhathi sakhe seMarathon u-2:17 indawo yesithathu ivalwe nguSimon Paulus (2:14:55).
Kwabesifazane u-Alemutu uqophe irekhodi lo mjaho enza u-2:26:44. Irekhodi lalo mjaho bekuwu-2:29:46 owenziwa nguCian Oldknow ngo-2024. Indawo yesibili ithathwe ngu-Annie Botha ngo-2:27:45 naye oqophe iPB yakhe ephula u-2:30 kwathi uSiflolina Chemeda wathatha indawo yesithathu.
“Ngijabule kakhulu ngokunqoba lo mjaho, ngaphinze ngenza nePB yami kuwona. Kuyinto engithokozise kakhulu. Bekunzima. Mina ngikholelwa ekutheni iMarathon iqala ku-37km nalapho ngikhethe khona ukuphuma esixukwini ngijahe uMoloi. Ngakwenza ngempumelelo lokho.
U-Annie Botha ongene isibili kwiDurban International Marathon wenze nePB isikhathi sakhe okungesesi-9 esisheshayo seMarathon eNingizimu Afrika
“Ilanga belishisa kakhulu kodwa kalingiphazamisanga ngoba ngilijwayele. Lishisa kakhulu ePretoria. Ngithanda ukubonga umqeqeshi wami uViolet Semenya. Ukuya kukuViolet noCaster Semenya kungisize kakhulu. Kube nomthelela ekwenzeni kwami lesi sikhathi,” kusho uMagwai.
Uqhube wathi sekukaningi ezama ukuthola igolide emidlalweni yezwe. Uthi unayo indondo yesiliva neyethusi njengoba esethola igolide kwiDurban International.
Ngokunqoba kwabo uMagwai no-Alemitu bagoduke nesamba sika-R80 000 ngokuhlukana kobulili kanti u-Alemitu no-Annie bathole amabhonasi ngokwenza isikhathi esingaphansi kuka-2:27 ngokwehlukana.
U-Enock Skhosana ungusihlalo weRoad Running kwi-Athletics South Africa (ASA) uthe nangonyaka ozayo lo mjaho uzokube uyingxenye yeSA Marathon Championships
Isiyonke imiphumela yalo mjaho ihambe kanje, kwabesilisa: 1.Reghen Magwai 2:11:20; 2.Samuel Moloi 2:11:31; 3.Simon Sibeko 2:12:11; 4.Thabang Mathebula 2:13:55; 5.Simon Paulus 2:14:55.Kwabesifazane: 1.Alemutu Lema 2:26:44; 2.Annie Botha 2:27:45; 3.Siflolina Daba Chemeda 2:36:15; 4.Alina Armas 2:37:43; 5.Caren Hurisa 2:40:39.