ITHEKU selimi ngomumo ngokuqala kweSALGA KZN DSAC Games
IKWAZULU-NATAL isimi ngomumo ukusingatha imidlalo yamaSalga KZN DSAC Games aqala ngoLwesine kuze kube yiSonto eThekwini.
Lo mqhudelwano uba minyaka yonke uhlelwe uMnyango wezeMidlalo kanti inhloso yawo ukuvundulula amakhono. Selokhu wasungulwa baningi abadlali asebevundululiwe abenza kahle emidlalweni yabo esifundazweni.
Phakathi kwabo singabala uSabelo Bhodoza, uSiyabonga Nkonde, uBongumusa Mthembu okungabasubath asebemele isifundazwe neNingizimu Afrika ngokwehlukana amnmahlandla amaningi. Abanye nguSiyabonga Sangweni obengukaputeni we-Orlando Pirates odlalile nakwiBafana Bafana ukubala nje abambalwa.
Kulo mqhudelwano kuzokuba kugaduliswana emidlalweni engaphezulu kuka-10 lapho kulindeleke nezinhloli zemidlalo eyahlukene ukuzohlwaya ithalente.
Phakathi kwemidlalo okuzokuba kugaduliswana kuyona ibhola lezinyawo labesilisa abesifazane okuyilona eliheha izindimbane zabantu, elo mqakiswano, ukugijima, ibhola lo mboxo, ikhilikithi, iBasketball, umdanso, ikarate ukubala nje embalwa.
Bazokube bekhona bonke omasipala besifundazwe ngaphandle kweHarry Gwala. Imeya yaseHarry Gwala uZamo Nxumalo uthe ngeke babe yingxenye yalo mqhudelwano. Uthi bashaywa imali.
Umengameli weKZN Sports Confederation uThami Mchunu uthe sebemi ngomumo ukusingatha lo mqhudelwano.
“Konke sekumi ngomumo sesilinde usuku lwangoLwesine zibulalana. Okusijabulisayo wukuthi izinkundla zeTheku sizondelene. Ungakwazi ukubuka imidlalo engaphezulu kwemihlanu uhamba ngezinyawo. Okuyinto enhle. Lemidlalo ibalulekile ngoba yilapho kuvundululwa khona ikhono. Kubalulekile ukuba abadlali bazimisele ngoba abanenhlanhla bangathola ithuba lokuya kude ngoba zizokube zikhona izinhloli zezemidlalo ezahlukene,” kusho uMchunu.