Abe-Runner Awards bathi basazozama ukuxoxisana neKZNA ukuze basebenzisane.
UNCOMA ukuzinikela kwabagijimi kwabagijimi ngempumelelo ukuba yingxenye yama-Runner Awards abengoMgqibelo ntambama eThekwini, yize kuke kwasabalala izindaba zokuthi kungenzeka abhuntshe. Lo mcimbi obuhlelwe nguSiyanda Sibiya cishe wabhuntsha ngezinsuku zokugcina ngemuva kokuba iKwaZulu-Natal Athletics (KZNA) ibhalele abagijimi abebeyingxenye yawo ibazisa ukuthi izobamiswa uma beqhubeka nokuba yingxenye yalo mcimbi.AKUCACI ngekusasa lama-Runner Awards kuhoxa abagijimi, abasatshiswa ngokumiswa
Sekuwumlando manje ukuthi lo mcimbi ugcine uqhubeke yize abagijimi abaningi namakilabhu sebehoxile bethi bathola izincwadi zibasabisa. Umnotho News unalo uhlo lwabagijimi namakilabhu ahoxile kulo mcimbi bethi bathole izincwadi eziphuma kwiKZNA zibazisa ngokuthi bazomiswa.
Abaphumele obala babhala izincwadi zokuhoxa kulo mcimbi nguSinethemba Ntshangase weMedbank osanda kuhlomula ngomklomelo wokuba umsubathi ovelele kumaKZNA Sports Awards noSphamandla Maduna okuthe ngeledlule waklonyeliswa kuma-Awards abehlelwe yiComrades Marathon.
Umqeqeshi ovelele kube nguProdigal Khumalo okubizwe igama lakhe engekho. UKhumalo uthe ujabulile ngokuthenjwa ngabasubathi ngokuba bamvotele abe ngumsubathi ovelele. Akathandanga ukunaba ngokuthi kungani engabanga yingxenye yomcimbi.
USiyanda Sibiya obehlela lo mcimbi uthe, ujabule ukuthi lo mcimbi uhambe kahle yize kuke kwaba nobuhixihixi bengaboni ngaso linye neKZNA.
“Cishe wangaba khona lo mcimbi. Kuqale isonto kukubi kakhulu abantu abaningi behoxa bethi bathole izincwadi ziphuma kwiKZNA. Besicabanga ukuvele siwukhansele noma ube virtual ngenxa yesimo. Abagijimi baphume ngobuningi babo ukuzokuba yingxenye yalo mcimbi. Sijabule kakhulu. Noma kanjani siyabuya ngonyaka ozayo.
“Nginesifiso sokuba sisebenzisane neKZNA ukuze lo mcimbi ube mkhulu kakhulu. Njengoba usuphelile lona ngizophinde ngizame ukuyokhulumisana nabo. Mhlawumbe kukhona esizophuma nakho kulokho,” kusho uSibiya.
Kulo mcimbi bekunemikhakha ecela ku-20 kanti abadidiyeli bathi inhloso yawo enkulu bekuwukuklomelisa abasubathi abangama-social runner kanti Iningi labahlomulile ngabavoteliwe. IHollywood Athletics Club ngenye yamakilabhu ahlomulile, iChillie Runner, uProdigal Khumalo oqokwe engekho nabanye.