UNYONGESA noNtsoaki bavikele izicoco zabo kwiBhamshela Race 10km
IMEYA yaseNdwendwe uSam Mfeka benoMandla Mngomezulu oyisekela mengameli kwiKwaZulu-Natal Athletics. ISITHOMBE: SITHUNYELWE
UBENJAMIN Nyongesa waseKenya noNtsoaki Molahloe bavikele ngempumelelo izicoco zabo kwiBhamshela Race 10km ebihlanganise no-5km ngeSonto eqale yaphinda yephelela eChief Ngonyama Secondary School, eNdwendwe. Lo mjaho bekungowesithathu nonyaka uhlelwe yiFast Movers AC, usihlalo wayo okuwu-Elias Mkhize osanda kubuyiselwa ekubeni ngusihlalo weLembe Sports Confederation.
UBENJAMIN Nyongesa obe yingqwele esigabeni sabesilisa. Isithombe: Sithunyelwe
Uxhaswe yiNdwendwe Municipality eholwa ngukhansela uSam Mfeka obeyingxenye ye-5km.Ngokunqoba kwabo uNyongesa noNtsoaki baazohlomulele ngo-R3000 ngokwehlukana.UNyongesa usejwayele ukwenza kahle emijahweni yakuleli njengoba ngeledlule engene isibili kuMsinga Half Marathon elandela umlingani wakhe athe baziqeqesha naye uLetlatsa Nape owaba yingwele.
Ĥ
UNyongesa waseKenya ushaye intambo ngesikhathi esiwu-30:36 elandelwa nguThapelo Ramokhoase owenze u-30:51 kwathi uNape wangena isithathu.UNyongesa uthe ujabule kakhulu ngokuvikela isicoco sakhe kulo mjaho. Uthi okumsize kakhulu wukuthi umzila walo mjaho uwazi njengoba ezazi.”Ngijabule ngokukwazi ukuvikela isicoco sami. Ngize kulo mjaho ngizilungiselele ngokwanele kwazise bekuyisifiso sami ukuvikela isicoco sami. Ngize kuwona ngizilungiselele ngokwanele.
ABASUBATHI boThandoleethu AC abebeyingxenye yomjaho.
Umjaho wanonyaka ubumuhle futhi ungenelwe ngabasubathi abasezingeni eliphezulu.”Ngithe uma ngisuka ebhantshini ngaqinisekisa ukuthi akekho ozokwazi ukumelana nami, kanti okungisize kakhulu wukuthi umzila ngiwazi njengoba ngizazi ngoba kuyenzeka ngiziqeqeshe kuwona. Ngithanda ukubonga kumasipala iNdwendwe ngokuhlela lo mjaho, ngiyafisa ukuba uqhubeke minyaka yonke,” kusho uNyongesa othe kunomjaho azokuya kowugijima eLesotho maduze.
UNtsoaki ushaye intambo ngesikhathi esiwu-35:54 evule igebe lekhilomitha ku-Andisiwe Njunguza owenze u-39:18 kwathi uNokuthula Ntshangase walala isithathu.UNtsoaki uthe ujabule kakhulu ngokuphinde anqobe. Uthi yize umzila ubewazi kodwa ubunzima. Uthi bathe bedlula ku-5km wasenyusa isivinini abehamba ngaso, bahluleka ukumelana naso. Uthi umjaho olandelayo awubhekile yiSpar Women’s 10km ezokuba ngenyanga ezayo kulandele i-Absa Durban neminye.
Imeya uMfeka ithe: “Ngijabule kakhulu ngokuba khona kwalo mjaho lapha endaweni. Ngihlale ngibagqugquzela abantu ukuba baziqeqeshe ukuze bakwazi ukulwa nezifo. Lo mjaho nami ebengiyingxenye yayo ubaluleke kakhulu lapha endaweni. Nami ngikwazile ukugijima i-5km ngayiqeda nabanye bangakwazi. Sisezihlelweni zokuba lo mjaho ukhule.” Lo mjaho ubungenelwe ngabasubathi abaningi abaphuma ngaphandle kwaseNdwendwe.