Bazobanga isiteki sika-R572 200 abasubathi abazokuba yingxenye yeHarry Gwala Marathon
Abaphathiswa baseHarry Gwala Municipality bekhombisa ngesikibha somjaho wanonyaka ozokuba ngeSonto ugubha unyaka weshumi wasungulwa. Isithombe: Sithunyelwe
SINGASE siphinde sisale eHarry Gwala isicoco seHarry Gwala Marathon yanonyaka ezokuba ngeSonto isukela eHighflats isongwe eMzimkhulu. Lo mjaho uzokube uhlanganise ne-21.1km ezosukela eXobho kube i-10km ezosukela phakathi kweXobho noMzimkhulu.
Yonke lemijaho izophelela eMzimkhulu kanti iMarathon ngeyokuzibejisela indawo kwiComrades Marathon ezokuba mhla ka-8 kuJune isukela eMgungundlovu isongwe eThekwini.
Nonyaka umsubathi obhekwe ukuba enze kahle kulo mjaho nguMfundo Chagwe wakhona eHarry Gwala. Lo msubathi kuthiwa uqatha ngendlela eyisimanga kanti nyakenye ubeyingxenye yoLundi Training Camp ebingoDecember wonke.
NguMfundo Chagwe okungomunye wabasubathi abayizimfivilithi kwiHarry Gwala Marathon ngeSonto. Isithombe: Sithunyelwe.
Umqeqeshi walo msubathi uChief Gabhisa uthe umfana wakhe usefomini enhle ngendlela eyisimanga. Ukuqinisekisile ukuthi uzokube eyingxenye yalo mjaho oxhaswe iHarry Gwala Municipality lapho izingqwele zeMarathon zihlomula ngu-R60 000 kwehle njalo kuze kufike kunombolo 10 ozohlomula ngo-R4000 kanti zike zahlomula ngemiklomelo wemoto phambilini. Izingwele ze-21km zizohlomula ngo-R10 000 kuthi kwi-10km kube ngu-R5000. Kuthiwa usuwonke umklomelo walo mjaho ngu-R572 200.
“Ngiyacabanga ukuthi nonyaka uMfundo uzokwenza kahle kulo mjaho. Ngendlela aziqeqesha ngayo kunginika elikhulu ithemba lokuthi kungenzeka ahambe ezinyathelweni zikamfowabo uThobani oke wasinqoba lesi sicoco phambilini.
“Okungijabulisa kakhulu wukuthi uziqeqesha naye umfowabo uThobani. Kodwa engingakusho wukuthi uMfundo ungaphezulu kakhulu kukaThobani. Sizokuba sikhona sizomeseka ukuqinisekisa ukuthi wenza kahle kulo mjaho. Nyakenye bengimyise kuLundi Training Run ngenhloso yokuthi afunde. Nginethemba lokuthi eminyakeni emibili kusuka manje uzokuba ngomunye wabasubathi abazogila izimanga kwiComrades Marathon. Ngendlela agxile ngayo kulo mdlalo wokugijima uzihlalela yedwa eToti. Into esemqondweni wakhe ukwenza kahle kulo mjaho,” kusho uGabhisa.
Imali yokujoyina kulo mjaho ngu-R350, kube wu-R300 kwi-21.1km kanti abe-10km bazokhokha u-R250. Izinamba zalo mjaho zizokube zitholakala ngoMgqibelo eXobho kanti abafuna olunye ulwazi ngalo mjaho bangaxhumana noThemba Gumede enombolweni ethi: 072 948 8779 noma bashayele enombolweni ethi: 039 834 8700. Ngolunye ulwazi ngangangenwa kwi-website ethi: www.harrygwaladm.gov.za.