UBEKELWE u-R100 000 uMokoka ukwenza u-27:48 kwi-Absa Durban

ABAHLELI be-Absa Run Your City 10k bathembise uStephen Mokoka u-R100 000 uma engakwazi ukwenza irekhodi lama-masters kulo mjaho ozokuba seThekwini mhla ka-13 kuJuly.
AbakwaStillwatersports abahlela lo mjaho batshele babeke eceleni isamba sika-R100 000 okuyibhonasi ezotholwa nguMokoka uma engakwazi ukwenza u-27:48 (Masters World Best) okuyisikhathi sama-Masters.

“I-Absa Run Your City ngeminye yemijaho ekhula ngesikhulu isivinini futhi siyaqinisekisa ukuthi abasubathi bakuleli siyababhekelela ngamabhonasi uma benze kahle. Ngesikhathi uStephen Mokoka ethi ufuna ukwenza irekhodi lama-masters ekuqaleni konyaka. Sibe sesibona ukuba simeseka ukufeza isifiso sakhe. Yingakho sithe sizomnika ibhonasi ka-R100 000 uma ekwazile ukwenza isikhathi esiwu-27:48 okuyisikhathi esenziwa nguBernard Langat ngo-2015 kwiGreat Manchester Run e-United Kingdom,” kusho uMichael Meyer oyisikhulu esiphezulu sakwaStillwatersports futhi ongumsunguli wama-Absa Run Your City Series.

UMeyer uphethe ngokuthi uMokoka ube yingxenye yemijaho yabo kusuka ngo-2015. Uthi ngalo R100 000 indlela abafuna ukumbonga ngayo.
Le midlalo yama-Absa Run Your City igijinywa eThekwini, eCape Town, eGqeberha, eTshwane naseJohannesburgh.

Imijaho ye-Absa ngeminye yemijaho ekhula ngesikhulu isivinini lapho abasubathi benza izikhathi ezinhle. UMokoka osubathela iHollywood Athletics Club uthe ujabule ngethuba alinikwe ngabakwaStillwatersports.
“Leli thuba esilinika ngabadidiyeli balo mjaho lisisiza kakhulu, futhi lenza nempilo yethu ibe lula. Kulezi zinsuku ukuze unqobe i-10km kufanele ube nezikhathi ezinhle. Uma uqophe u-28:10 awungeni ngisho kwi-top 10.

“Umqeqeshi wami ungibuyisele ezindleni zami zakudala. Ngimatasa ngiziqeqesha u-University of Johannesburgh ngaphansi kweSponge Group. Ziyabuya lapha. Ngiphenduke umfana omncane. Nginethemba lokuthi ngosuku lo mjaho isimo sezulu saseThekwini sizokube sisihle, ukuze ngikwazi ukwenza irekhodi likaLangat,” kusho uMokoka.