Ubuyelwe ithemba uKhonkhobe edla umhlanganiso kwi-Om Die Dam Marathon
Uyishaye kanje intambo uLebogang Khonkhobe enqoba i-Om Die Dam Marathon: Isithombe: Nedbank Running Club
ISIBHEKE ukwenza kahle kwiComrades Marathon ingqwele ye-Om Die Dam Marathon uLebogang Khonkhobe. UKhonkhobe oneminyaka ewu-36 ubudaba udle umhlanganiso kulo mjaho ngesikhathi esiwu-2:55:10 emiswe kabi nguMthembeni Mahlobo naye oqophe u-2:55:10 kwathi uSfiso Nqamakhwe wathatha indawo yesithathu ngesikhathi esiwu-2:58:00. Ngokunqoba kwakhe uKhonkhobe osubathela iNedbank Running Club uhlomule ngesamba sika-R25 000.
Ngokombiko we-The Top Runners lo msubathi unqoba lo mjaho nje, usanda kuphoxa engena unombolo 13 kwiBalwin Sport Peninsula Marathon ebihlanganise ne-Athletics South Africa (ASA) National Marathon ebingenyanga edlule eCape Town. Kuthiwa lo msubathi waya eCape Town ezimisele ukungena nabokuqala abathathu kulo mjaho owagcina unqontshwe nguBennet Seloyi weCentral Gauteng Athletics (CGA).”Ngiwugijimi oseqophelweni eliphezulu futhi okhokhelwayo. Ngigijime kahle namuhla ngoba besengikudlulisile okwenzeke eCape Town. Ngaya eCape Town ngiqatha. Nginethemba lokuthi ngizokwenza kahle kahle futhi ngangiqatha ngokwanele kodwa izinto kazihambanga njengezifiso zami.
Yingxenye yabasubathi abebeyibambe kulo mjaho:Isithombe: Om Die Dam Facebook
Yize kunjalo kodwa ngaqinisekisa ukuthi ngizowuqeda umjaho. Ngigcina ngiqophe isikhathi esiwu-2:29:29,” Kusho uKhonkhobe ekhuluma ne-The Top Runners. Lo msubathi ubeqala ukunqoba umjaho omkhulu ikakhulukakazi i-Ultra. Utshele abezindaba ukuthi iphupho lakhe ukuthola indondo yegolide kwiComrades Marathon aphume kuyo unombolo 38 kuyona ngo-2023.
Lo msubathi uzokube egijima nomalume wakhe u-Onnalenna Khonkhobe oyingqwele yeTwo Oceans ne-African Bank Soweto Marathon ngokwehlukana.URone Steenkamp ube yingqwele kwabesifazane ebeka isikhathi esiwu-3:40:32 elandelwa ngu-Arouchelle Nieuwenhuis (3:47:11) kwathi uMelinda Jansen van Vuuren walala isithathu ebeka u-3:50:24. Kusenjalo uMohau Rasago noGillian Farquharson badle umhlanganiso kwi-21.1km ngokuhlukana kobulili.