Ufisa ukuyogijima iCape Town Marathon onqobe iDurban City
INGQWELE yeDurban City Marathon uScelo Mkhwanazi osubathela iPhantane Athletics Club unesifiso sokugijima iSanlam Cape Town Marathon ezokuba ngoMay eCape Town.
UMkhwanazi udle umhlanganiso ngesikhathi esiwu-2:21 kulo mjaho waqophe i-personal best njengoba ubeno-2:23 awenze nyakenye khona kuwo lo mjaho. Lo mjaho ubuhlanganise i-42km, i-21km, i-10km no-5km kanti ubungenelwe ngabasubathi abawu-5000. UMkhanazi uqophe isikhathi esiwu-2:21:51 evule igebe lika-1km kulithokoa Khoete ongene isibili ngo-2:25:07 kwathi uSkhumbuzo Mpanza walala isibili ngo-2:30:55.
Esigabeni sabesifazane ingqwele kube ngu-Annie Botha oqophe u-2:33:35 evule igebe lika-10km kuNonhle Dlamini owenze u-3:08:55 kwathi uJadi Davy walala isithathu ngo3:10:18. UMkhwanazi onqobe uMhlathuze Marathon ngeledlule uthe vele inhloso yakhe bekuyilo mjaho (Durban City). Uthi kube ibhonasi ukunqoba iDurban City njengoba eqale ukugijima kuyona edlula ku-28km lapho ebona ukuthi abantu abakuyona kabagijimi.
“Ngijabule kakhulu ngokunqoba lo mjaho. Nyakenye ngingene isibili kuwona ngenza isikhathi esiwu-2:23 kanti namuhla ngiqophe u-2:21 okuyiPB yami. Umjaho ubumuhle uhleleke kahle.
“Ngibone ngidlula ku-15km ukuthi ngizowuthatha ngoba bengiku-top 10 ngihamba nabasubathi be-21km. Ngidlule ku-halfway ngo-1:08 ngaze ngayoshaya intambo ngihamba ngedwa. Isifiso sami esikhulu ukuyogijima iSanlam Cape Town Marathon kodwa ngisazolinda ngizwe ukuthi umqeqeshi wami uthina. Uma evuna amabombo abheke eCape Town ngenyanga ezayo,” kusho uMkhwanazi.
UMkhwanazi oneminyaka ewu-22 ubudala uthe lo mklomelo awutholile ka-R15 000 uzomsiza kakhulu kwazise ukugijima uziphilisa ngakho futhi akasenabo abazali kanti akasebenzi.UCeli Makhoba ongomunye wabadidiyeli balo mjaho uthe umjaho uhambe kahle kakhulu.
Uthi bajabule ngokukwazi ukuthola isibalo abebesidinga okuwu-5000. Uthi bahlongoza ukuba basenyuse ngonyaka ozayo baphinde banyuse nemali. Uthi okuhlukile abakwenzayo bafakela abasubathi amabhonasi uma benze izikhathi ezithile emabangeni abayingxenye yawo.
Imiphumela ye-42km ihambe kanje, kwabesilisa: 1. Scelo Mkhwanazi 2:21:51
2.Litlkokoa Khoete 2:25:07
3.Skhumbuzo Mpanza 2:30:55.
Kwabesifazane: 1.Annie Botha 2:33:35.
2.Nonhle Dlamini 3:08:55
3.Jadi Davy 3:10:18
Eka-21km kwabesilisa: 1.Adam Lipschitz 1:03:40
2.Jobo Khatoane 1:04:33
3.Simon Mwangi 1:04:54
Kwabesifazane: 1.Rholex Kogo 1:15:23
2.Jade de Sousa 1:24:33
3.Fikile Mbuthuma 1:27:01.
Eka-10km kwabesilisa: 1.Victor Lapit 30:58
2.Apiwe Sibuta 31:49
3.Sinenhlanhla Buthelezi 31:57
Kwabesifazane: 1.Ntsoaki Molahloi
2.Noxolo Ndakayi 42:26
3.Shani Silver 43:14