UTHWELE amathemba elakuleli uGelant kumaWorld Champs

IZINGWAZI zabasubathi bakuleli bafisela u-Elroy Gelant inhlanhla njengoba kuzokube kunguye yedwa ozokube eyibambe kwiMarathon ebagadulisa kumaWorld Athletics Championships aqala ngoMgqibelo eJapan.

Abasubathi beMarathon bahoxile ekumeleni izwe kulo mqhudelwano labo basubathi nguStephen Mokoka, u-Adam Lipschitz, uThabang Mosiako noGlenrose Xaba abebeyingxenye yeqembu leMarathon.UMokoka uthe umfisela konke okuhle u-Elroy emjahweni wakhe ozokuba ngoMsombuluko ekuseni ngo-00:30.

“Nginethemba lokuthi u-Elroy uzokwenza kahle kwiMarathon. Ube nonyaka omuhle kakhulu. Usanda kwenza irekhodi lakuleli leMarathon (2:05) abeselihlale isikhathi eside. Benginethemba lokuthi yimina ozolenza kuqala. “Nyakenye wenze kahle kakhulu engena unombolo 11 kuma-Olympic Games eFrance. Akagcinanga lapha usanda kwenza isikhathi esiwu-27 kwi-10km.

Okuhle ukuthi labantu azokube egijima nabo abanye babo uyabazi. Ngiyazi ukuthi umjaho wakhe uzokuba sekuseni kakhulu kodwa ngeke ngilale. Uma uJosiah Thungwane akwnenza enqobela izwe indondo yama-Olympic ngo-1996 naye u-Elroy angakwazi,” kusho uMokoka ongene unombolo 5 kuwo lo mqhudelwano ngo-2019.

Abanye abafisele u-Elroy ukuba agijime kahle nguGerda Steyn abebehambe naye nyakenye ukuya kuma-Olympic Games. Njengaye uMokoka uGerda uthi u-Elroy ungumuntu ozimiselayo futhi ophokophelayo uma kukhona into ayifunayo. Uthi angajabula uma u-Elroy engakwazi ukubuya nendondo eJapan.